У Нароўлі пасля маштабнай рэканструкцыі адкрыўся гарадскі стадыён «Страла»

Стадыён стаў часткай рэгіянальнага праекта па стварэнні спартыўных пляцовак у раённых цэнтрах.

Мясцовых жыхароў павіншавалі старшыня абласнога выканаўчага камітэта Іван Крупко, памочнік Прэзідэнта – інспектар па Гомельскай вобласці Юрый Горлаў, старшыня Нараўлянскага райвыканкама Уладзімір Антоненка, дырэктар дэпартамента «Беларуская федэрацыя футбола» Іван Гаравец.

– У нашай вобласці ўвод спартыўных аб'ектаў становіцца добрай традыцыяй. Думаю, колькасць прыхільнікаў здаровага ладу жыцця ў Нароўлі цяпер стане больш. Дзякуючы падобным аб'ектам моладзь не будзе аддадзена вуліцы, а вырасце моцнай, хлопцы стануць годнымі грамадзянамі нашай краіны.

Кіраўнік рэгіёна назваў і планы: на завяршальнай стадыі знаходзіцца будаўніцтва басейна ў Гомелі, стадыёнаў у Акцябрскім, Карме і Ельску – яны будуць уведзены ў гэтым годзе. Закладваюцца стадыёны ў Лоеве і Буда-Кашалёве:

– Тым самым мы вырашаем шэраг задач ад падрыхтоўкі спартсменаў да міжнародных стартаў да агульнага ўмацавання фізічнага здароўя насельніцтва. Сярэдняя загрузка фізкультурна-спартыўных збудаванняў у вобласці летась склала 95%. Упэўнены, што і гэта футбольнае поле будзе распісана для заняткаў пад поўную загрузку.

Галоўнай кропкай прыцягнення спартсменаў стане футбольнае поле са штучным пакрыццём. Аматары забіць шайбу таксама змогуць папрактыкавацца: на стадыёне з'явілася пластыкавая хакейная каробка 60 на 26 метраў. Зручна будзе і лёгкаатлетам, і прадстаўнікам іншых відаў спорту: абсталявалі ўніверсальную спортпляцоўку для заняткаў баскетболам і валейболам, усталявалі вулічныя трэнажоры. У будынку размясціліся распранальні і душавыя, трэнажорная зала.

Стадыён прымыкае да маладзёжнага спартыўнага цэнтра «Алімп», які пераабсталявалі ў 2022 годзе з мясцовага кінатэатра «Юнацтва». Зараз тут праходзяць трэніроўкі па вольнай барацьбе і боксе, заняткі па фітнесу. У перспектыве плануюць абсталяваць трэнажорную залу.

Падчас адкрыцця стадыёна губернатар уручыў спартсменам Нароўлі сертыфікат на набыццё спецтэхнікі, а Іван Гаравец падарыў футбалістам камплекты формы і мячы.

Сюрпрызам стаў падарунак ад суседняга рэгіёна: старшыня Мазырскага райвыканкама Алена Паўлечка перадала сертыфікат на ўмацаванне матэрыяльна-тэхнічнай базы стадыёна.

Адзначылі і будаўнікоў, якія рэканструіравалі спартыўны аб'ект.