Першы ў раёне і 45-ы ў краіне: у Светлагорску адкрылі Лядовы палац

Будаўніцтва комплексу аднавілі вясной мінулага года пасля кансервацыі. Аб'ект быў уключаны ў Дзяржаўную інвестыцыйную праграму на 2023 год.

Палац размясціўся каля мікрараёна Маладзёжны недалёка ад стадыёна "Папернік". Лядовая арэна змяшчае каробку памерам 60 на 26 метраў, 490 глядацкіх месцаў, трэнажорную, акрабатычную, харэаграфічную залы, кідковы пакой, судзейскія, памяшканні выдачы і завострывання канькоў. Устаноўлена самае сучаснае халадзільнае абсталяванне, сістэма кандыцыянавання.

Да ўрачыстай цырымоніі далучыліся старшыня Гомельскага абласнога выканаўчага камітэта Іван Крупко, губернатар Бранскай вобласці Аляксандр Багамаз, першы намеснік міністра спорту і турызму Аляксандр Дараховіч, член Савета Рэспублікі Нацыянальнага сходу Рэспублікі Беларусь Дзмітрый Баскаў.

Кіраўнік рэгіёна нагадаў словы Прэзідэнта аб тым, што без спорту і здаровага ладу жыцця не будзе здаровай нацыі:

– Лядовая арэна – гэта клопат аб здароўі нацыі. Вы бачылі, колькі тут сабралася гараджан: аб'ект доўгачаканы. Хачу сказаць афіцыйна, што даручэнне кіраўніка дзяржавы выканана. Створаны ўсе ўмовы для занятку фізкультурай, хакеем, для чаго ўжо падабраны трэнерскі састаў. У будучыні будзем развіваць фігурнае катанне, сёлета ў горад прыедуць маладыя спецыялісты для падрыхтоўкі спартсменаў. Упэўнены, што хутка мы даведаемся аб трэцяй школе хакея, акрамя гомельскай і жлобінскай з'явіцца светлагорская.

Ад жыхароў сваёй вобласці светлагорцаў павіншаваў губернатар Браншчыны Аляксандр Багамаз. Кіраўнікі двух рэгіёнаў сышліся на думцы, што такія аб'екты будуюцца ў першую чаргу для дзяцей, а міжнародныя турніры дапамагаюць згуртаваць маладое пакаленне дзвюх краін. Таму сёлета каманды суседніх рэгіёнаў розных узростаў яшчэ не раз выйдуць на лёд:

– Рабяты павінны з дзяцінства сустракацца, знаходзіць сяброў. Гэта будучыня нашых краін. Сімвалічна, што самыя маленькія хакеісты апрабавалі гэты лёд. Для гэтага і працуюць сумесныя праграмы, каб дзеці не толькі спаборнічалі, але і сябравалі.

Аляксандр Дараховіч адзначыў, што хакейная пляцоўка ў Светлагорску – 45-я ў краіне. Яна была вельмі патрэбная маладому і спартыўнаму гораду:

– Жадаю вам, каб у палац выстраілася чарга з жадаючых займацца спортам, а пляцоўка стала кузняй падрыхтоўкі чэмпіёнаў!

Адкрыццё працягнула гульня аматараў – зборнай Гомельскай вобласці і Прэзідэнцкай каманды.

– Па даручэнні Прэзідэнта мы прыбылі з хакейнай камандай павітаць жыхароў Светлагорска і павіншаваць іх з адкрыццём Лядовага палаца. Будаўніцтва такіх аб'ектаў неабходна для развіцця новага пакалення беларусаў. Упэўнены, што гэтае месца стане цэнтрам прыцягнення. Адкрыць арэну адно, а насыціць паўнавартасным жыццём – іншае. Упэўненыя, што ў жыхароў і кіраўніцтва горада гэта атрымаецца, – не сумняваецца Дзмітрый Баскаў.

Як расказаў журналістам начальнік упраўлення спорту і турызму аблвыканкама Павел Старасветскі, у Светлагорску ўжо прыняты на працу штатны трэнер, які праводзіць адбор юных хакеістаў. Спартсмены пачалі падрыхтоўку на зямлі, зараз будуць трэніравацца на лёдзе:

– Упэўнены, што хакею ў гэтым горадзе быць. Займацца спортам будуць прыязджаць людзі і з найбліжэйшых населеных пунктаў. Сёння ў краіне фактычна няма такіх аб'ектаў.