"Гомель" выйграў шосты матч запар у чэмпіянаце Беларусі па хакеі

Паядынкам "Гомеля" і "Юнацтва" завяршылася гульнявая праграма панядзелка ў беларускай хакейнай экстралізе, паведамляе карэспандэнт БЕЛТА.

У папярэднім матчы каманд, які прайшоў у суботу, 21 кастрычніка, таксама ў гомельскім лядовым палацы, гледачы ўбачылі сем закінутых шайбаў (гаспадары перамаглі 5:2). Аднак гульня ў адказ высокай рэзультатыўнасцю не бліснула - галявая засуха прадоўжылася аж да пачатку трэцяга перыяду. Толькі на 43-й хвіліне сустрэчы лік адкрыў форвард "Гомеля" Арсеній Дзярыба, а ўсяго праз некалькі атак жыхары паўдня падвоілі перавагу намаганнямі абаронцы Паўла Воранава. Незадоўга да сірэны Арсеній Каўгарэня скараціў адставанне гасцей, але на большае мінчан не хапіла. Канчатковы лік - 2:1, "рысі" прадаўжаюць пераможную серыю да шасці матчаў, сталічны клуб, наадварот, церпіць трэцюю няўдачу запар.

Дзякуючы гэтаму поспеху "Гомель" адарваўся ад "Юнацтва" ў турнірнай табліцы ўжо на тры балы: у "рысей" 29 ачкоў пасля дзевятнаццаці гульняў і трэцяе месца, у мінчан чацвёрты радок і 26 ачкоў. Раней у панядзелак "Нёман" у гасцях разграміў "Магілёў" (8:3) і максімальна наблізіўся да "Юнацтва" - цяпер гродзенцы адстаюць ад "чырвона-сініх" усяго на бал. Таксама 23 кастрычніка лідар экстралігі "Віцебск" атрымаў упэўненую перамогу над "Металургам", тым самым давёўшы колькасць набраных ачкоў да 34. Другім з 30 баламі ідзе "Шахцёр", які сваю гульню 19-га тура правядзе 24 кастрычніка супраць "Лакаматыва". Акрамя таго, 24 кастрычніка адбудуцца сустрэчы "Ліда" - "Дынама-Маладзечна" і "Хімік" - "Брэст".