З максімальнай загрузкай: гатоўнасць гомельскіх школ да навучальнага года праверыў Іван Крупко

Падчас аб'езду ўстаноў адукацыі Савецкага раёна Гомеля старшыня аблвыканкама Іван Крупко праверыў іх гатоўнасць да новага навучальнага года. 

На асаблівым кантролі сёння – школы і дзіцячыя сады, у якіх вучацца ў тым ліку дзеці са Шведскай Горкі. На правядзенне рамонтных работ у гэтым годзе з бюджэту былі выдзелены значныя сродкі. 

Будынкі 80-х гадоў пабудовы да сустрэчы рабят падрыхтавалі капітальна: адбываецца планавая замена вокнаў і дзвярэй, рамонт у харчблоках, спартыўных залах і санвузлах, пры неабходнасці мяняюць дах. Асобную ўвагу надалі бяспецы: з'явілася прапускная сістэма, відэаназіранне па перыметры навучальных устаноў, магнітныя замкі. 

Змяніліся і тэрыторыі на вуліцы: з'яўляюцца новыя футбольныя і баскетбольныя пляцоўкі, клумбы, асфальтавае пакрыццё. 

– Гэтыя сады і школы павінны быць цалкам укамплектаваныя, тут павінна быць камфортна кожнаму. Што тычыцца бяспекі, звярніце ўвагу на пешаходныя пераходы каля навучальных устаноў і асвятленне па шляху дзяцей з дому, – адзначыў Іван Крупко.

Усяго ў абласным цэнтры 71 школа, 1 верасня яны сустрэнуць 57 тысяч навучэнцаў, а ў 127 дзіцячых садкоў прымуць каля 17 тысяч выхаванцаў. Адно з даручэнняў старшыні аблвыканкама сістэме адукацыі – узмацніць добраўпарадкаванне на тэрыторыі навучальных устаноў:

– Станоўчыя прыклады ў вобласці ёсць, гэты вопыт трэба распаўсюдзіць на іншыя ўстановы адукацыі. Вучні з педагогамі могуць пасадзіць дрэва, самастойна вырасціць кветкі. У бліжэйшай перспектыве – правесці конкурс на самую добраўпарадкаваную тэрыторыю, тады ў хлопцаў будзе стымул.

Губернатар даручыў таксама прадумаць магчымасць укаранення ў адукацыйную праграму вывучэння кітайскай і арабскай моў. Факультатывы ў асобных школах ёсць, але не заўсёды гэтага дастаткова:

– Спецыялісты для супрацоўніцтва з гэтымі краінамі ў рэспубліцы запатрабаваныя.

Як распавёў начальнік галоўнага ўпраўлення адукацыі аблвыканкама Руслан Смірноў, падрыхтоўка да навучальнага года падыходзіць да лагічнага завяршэння, а да 20 жніўня чакаецца падпісанне ўсіх пашпартоў гатоўнасці. Тады 1116 устаноў адукацыі рэгіёна будуць гатовыя да прыёму дзяцей:

– З бюджэту вобласці выдзелена звыш 50 мільёнаў рублёў на пытанні тэхнічнага характару, капітальны і бягучы рамонты. Ёсць праграма замены аконных блокаў, да канца года будуць завершаны работы па ўстаноўцы абсталявання ўваходных груп ахоўнай сігналізацыяй. Выдзелены сродкі таксама на аўтаномныя пажарныя сігналізацыі, закупку абсталявання і мэблі.

Па ўсёй вобласці праходзіць перааснашчэнне прадметных кабінетаў. Закуплена звыш 40 камп'ютарных класаў, умацоўваецца хіміка-біялагічны і фізіка-матэматычны профіль, абнаўляюцца кабінеты працоўнага навучання. Абнаўляецца таксама аўтапарк, за апошнія чатыры гады заменена 70% школьных аўтобусаў.