Вынікі работы гомельскай міліцыі ў 2024 годзе падвялі на калегіі УУС аблвыканкама

У сваёй справаздачы начальнік УУС Гомельскага аблвыканкама Аляксандр Шастайла заўважыў, што ў мінулым годзе на Гомельшчыне зарэгістравана менш забойстваў, крадзяжоў, рабаванняў, хуліганства і махлярства. 

Захоўваецца станоўчая тэндэнцыя па зніжэнні уліковых ДТЗ. Гомельская аўтаінспекцыя ажыццяўляе аналіз усіх навін у іншых дзяржавах і ўкараняе інавацыі ў сваю работу. Асаблівая ўвага была ўдзелена забеспячэнню бяспекі грамадзян у прыгранічных раёнах. Гатоўнасць эфектыўна рэагаваць на любыя выклікі даказалі і падчас электаральнай кампаніі па выбарах Прэзідэнта Беларусі.

Працягваецца работа па забеспячэнні эканамічнай бяспекі краіны, у выніку прадпрынятых мер у 2024-м дасягнуты рэальны эканамічны эфект на суму звыш 1 мільёна рублёў. Асобная ўвага надаецца прафілактыцы кіберзлачынстваў, а колькасць непаўналетніх, уцягнутых у незаконны абарот наркатычных сродкаў, знізілася з дваццаці да адзінаццаці чалавек. Абсталяванне сродкамі відэаназірання месцаў масавага знаходжання грамадзян, вуліц і дарог дапамагло раскрыць 274 злачынствы, сярод якіх асабліва цяжкія.

Праваахоўнікі прыйшлі на дапамогу раёнам вобласці, якія пацярпелі ад урагану: кантралявалі бяспеку дарожнага становішча, ахоўвалі генератары, падключыліся да ліквідацыі наступстваў стыхіі. Міліцыянеры актыўна далучаюцца і да рэгіянальных сацыяльна значных акцый: высаджваюць лес, удзельнічаюць у велапрабегах, суботніках. А работа з патрыятычнымі клубамі не толькі не спыняецца, але і нарошчвае абароты.

 

– У мінулым годзе органы ўнутраных спраў Гомельскай вобласці справіліся ў поўным аб'ёме з пастаўленымі задачамі. Не дапушчаны рост злачынстваў, у тым ліку ў сельскай мясцовасці, сярод непаўналетніх, раней судзімых, а таксама асобамі ў стане алкагольнага ап'янення, — расказаў журналістам першы намеснік міністра МУС Юрый Назаранка. 

Генерал-маёр міліцыі абазначыў прыярытэтныя напрамкі работы ў 2025 годзе: прадоўжыць прафілактычную работу з насельніцтвам, асабліва па недапушчэнні п'янства, злачынстваў у сферы хатняга насілля, супрацьпраўных дзеянняў сярод непаўналетніх і замежных грамадзян. 

– Ва УУС Гомельскага аблвыканкама ёсць усё неабходнае, каб выканаць усе пастаўленыя задачы і дасягнуць самых высокіх вынікаў, — не сумняваецца Юрый Назаранка.

За выдатную службу супрацоўнікаў падзякаваў намеснік старшыні аблвыканкама Андрэй Бараноўскі:

– На працягу года вы праводзілі зладжаную і эфектыўную работу. Вы годна спраўляецеся з пастаўленымі задачамі. Вось ужо некалькі гадоў запар на тэрыторыі вобласці назіраецца зніжэнне агульнай колькасці зарэгістраваных злачынстваў – на 8,5% у 2023 годзе і практычна на 13% па выніках 2024 года. Дзякуючы вашым граматным і дакладным дзеянням парадак і бяспека жыхарам вобласці гарантаваны.

Андрэй Бараноўскі ўручыў ганаровыя граматы і падзякі аблвыканкама міліцыянерам за шматгадовую і плённую працу. Узнагародзілі таксама падраздзяленні і супрацоўнікаў органаў унутраных спраў, якія дабіліся высокіх вынікаў у аператыўна-службовай дзейнасці. За паспяховую службу сертыфікаты на аўтамабілі ўручылі АУС адміністрацыі Чыгуначнага раёна Гомеля і АУС Ельскага райвыканкама. 

Напярэдадні Дня вываду савецкіх войскаў з Афганістана памятныя падарункі атрымалі ветэраны органаў унутраных спраў, якія прымалі ўдзел у баявых дзеяннях.