Ва ўсіх населеных пунктах Гомельшчыны ёсць электразабеспячэнне, але магчымы прафілактычныя адключэнні

Як было агучана на нарадзе ў аблвыканкаме, на раніцу 22 ліпеня ва ўсіх населеных пунктах вобласці ёсць электрычнасць. Дзе на сталай аснове, дзе часова – дзякуючы дызель-генератарам.

61 населены пункт – менавіта столькі падключана да дызель-генератарных установак. Працуе больш за 70 брыгад энергетыкаў, ім дапамагаюць іншыя службы, каб у найкарацейшыя тэрміны перайсці на пастаянныя схемы электразабеспячэння. Аднак ёсць праблемныя ўчасткі, тры лініі, напрыклад, поўнасцю знішчаны. Апрача таго аднаўляць іх даводзіцца на балоцістай мясцовасці.

Актыўна і паўсюдна працуюць рамонтнікі, прыцягнуты ўсе службы, іншыя арганізацыі. Праводзяцца расчыстка дарог, дахавыя і іншыя будаўнічыя працы. Аднаўляюцца ў першую чаргу жылыя дамы, аб'екты АПК, ЖКГ, сацкультбыту.

Энергетыкі сумесна з лясгасамі ўзмоцнена займаюцца пашырэннем прасек. Як заўважыў губернатар Іван Крупко, не трэба чакаць, пакуль дрэвы, якія пацярпелі ад урагану канчаткова ўпадуць, гэтыя рызыкі важна ўстараняць неадкладна.

Не падключанымі да сеткі на месцах застаюцца толькі асобныя домаўладанні, гэта аператыўна вырашаецца. Магчымы таксама адключэнні на гадзіну ці паўтары гадзіны там, дзе электразабеспячэнне было адноўлена. Грамадзяне павінны з разуменнем да гэтага ставіцца.

Ва ўзмоцненым рэжыме працуюць страхавыя агенты. На Гомельшчыне за тры дні пасля ўрагану арганізацыі "Белдзяржстраху" зрабілі выплаты на суму каля 390 тысяч рублёў. Заяўкі ад грамадзян, чыя маёмасць пацярпела ад стыхіі, працягваюць прымацца. Колькасць заяў на кампенсацыю ўрону перавысіла 7500. Аднак паток зваротаў ужо пачаў спадаць. Аддзяленні "Белдзяржстраху" працуюць штодзень да 20.00.

Удзел у нарадзе прынялі намеснік прэм'ер-міністра і ўпаўнаважаны кіраўніка дзяржавы па Гомельскай вобласці Анатоль Сівак, намеснік міністра энергетыкі Дзяніс Мароз.