Грамадства
У Гомелі з 1 снежня з'явіцца новы "бацькоўскі маршрут"
15.11.2024
У Гомелі з 1 снежня з'явіцца новы "бацькоўскі маршрут" № 32 для падвозу дзяцей са Шведскай Горкі ў школы Савецкага раёна – № 43 і 17.
Па ім ужо праехалі старшыня аблвыканкама Іван Крупко і памочнік Прэзідэнта – інспектар па Гомельскай вобласці Юрый Горлаў.
Губернатар праінспектаваў, як падрыхтавана інфраструктура для арганізацыі аўтобуснага руху з улікам бяспекі школьнікаў і іх бацькоў.
– Усё трэба зрабіць так, каб людзям было камфортна: школьнікі не павінны лішні раз пераходзіць дарогу, а дарослыя павінны быць упэўнены ў бяспецы дзяцей, – рэзюмаваў Іван Крупко.
Па ходзе руху новага "бацькоўскага маршруту" абсталяваны прыпынкі, устаноўлена дадатковае асвятленне, нанесена адпаведная разметка. Так дзецям не давядзецца некалькі разоў пераходзіць праз дарогу, яны змогуць сесці ў аўтобус на зручным прыпынку.
Уладкаваны пешаходныя дарожкі ад прыпынкаў да ўстаноў адукацыі.
Плануецца таксама нязначна змяніць маршрут аўтобуса № 51, каб ён падвозіў навучэнцаў да школы № 32.
Усяго ў Гомелі працуе 11 "бацькоўскіх маршрутаў", якія забяспечваюць падвоз дзяцей у школу з Новага Жыцця, Раманавічаў і Чырвонага Маяка. У верасні запрацаваў такі маршрут з Любенскага мікрараёна да прыпынку "Сонечная" праз вуліцу Братоў Лізюковых.
Расклад такога транспарту складаецца з улікам пачатку і заканчэння ўрокаў у школах, працоўнага дня ў дзіцячых садах.