У Гомелі ў Дзень пажылых людзей прайшоў "Сярэбраны баль "Натхненне"

У абласным драмтэатры сабраліся людзі, якія ў сталым узросце знаходзяць цікавыя заняткі. У ліку хобі, напоўненых радасцю і пазітывам, – танцавальнае мастацтва.

Яркае выступленне гасцям свята падарылі ўдзельнікі ансамбля бальнага і гісторыка-бытавога танца "Сярэбраны век". І гэта яшчэ не ўсё. Для 25 пар элегантнага ўзросту з усёй вобласці яны правялі майстар-класы, у ліку якіх "Дунайскія хвалі" і "Кадрыль".

Намеснік старшыні аблвыканкама Дзмітрый Алейнікаў адзначыў, што людзі пажылога ўзросту і сёння праяўляюць актыўную жыццёвую пазіцыю, перадаюць вопыт новым пакаленням і ўносяць неацэнны ўклад у развіццё грамадства. У сваю чаргу дапамога і падтрымка для пажылых людзей у прыярытэце дзяржаўнай палітыкі нашай краіны.

Архіепіскап Гомельскі і Жлобінскі Стэфан падкрэсліў: нягледзячы на тое, што людзі, якія так лёгка кружацца ў танцы, пражылі жыццё і прайшлі выпрабаванні, захавалі любоў і бляск у вачах.

– Гледзячы на вас, на такія выдатныя пары, нельга вамі не захапіцца, вы прыклад для многіх, – падзялілася ўражаннямі кіраўнік спраў аблвыканкама, старшыня абласной арганізацыі Беларускага саюза жанчын Алена Клічкоўская. – Спадзяюся, такія цудоўныя святы з удзелам людзей залатога ўзросту стануць традыцыяй.