У аблвыканкаме прайшла сустрэча губернатара Івана Крупко з Надзвычайным і Паўнамоцным Паслом КНР Чжанам Вэньчуанем

Бакі абмеркавалі перспектывы развіцця двухбаковых адносін. Быў зроблены акцэнт на ўмацаванні беларуска-кітайскіх міжрэгіянальных сувязей.

Як падкрэсліў Іван Крупко, тавараабарот паміж нашым рэгіёнам і Паднябеснай няўхільна расце. На пастаўкі ў КНР акрэдытавана 20 прадпрыемстваў Гомельшчыны. У аснове экспарту цэлюлоза, прадукты харчавання. Мы можам павялічыць адгрузкі ў Кітай угнаенняў, прадуктаў харчавання, драўніны, іншых тавараў, заўважыў старшыня аблвыканкама.

Развіццю супрацоўніцтва спрыяюць заключаныя пагадненні з шэрагам правінцый КНР, пабрацімскія сувязі з кітайскімі гарадамі. 

 "Гатовы абмяркоўваць любыя пытанні і забяспечым усебаковую падтрымку па ўсіх пазітыўных ідэях для развіцця супрацоўніцтва», – запэўніў Іван Крупко.

Надзвычайны і Паўнамоцны Пасол Кітая ў Беларусі Чжан Вэньчуань адзначыў, што на фоне складанай геапалітычнай абстаноўкі шматгадовае сяброўства Беларусі з Кітаем застаецца яркім прыкладам міжнародных адносін, заснаваных на роўнасці інтарэсаў, узаемавыгадным супрацоўніцтве па ўсіх напрамках.

Пасол падкрэсліў зацікаўленасць у пашырэнні міжрэгіянальнага партнёрства, уключаючы пабрацімскія сувязі паміж гарадамі.

Чжан Вэньчуань падзякаваў кіраўніцтву вобласці за падтрымку ін-стытута Канфуцыя ў Гомелі, інтарэс да кітайскай культуры ў цэлым, а таксама садзейнічанне дружбе паміж ВНУ КНР і Гомельшчыны. Пасол пазначыў імкненне кітайскага боку ўзмацніць супрацоўніцтва ў сферах культуры, спорту і турызму.

У завяршэнне сустрэчы кітайскіх партнёраў запрасілі на міжнародны эканамічны форум у Гомелі, які пройдзе ў верасні гэтага года.