Цэнім інтарэсы кожнага: Аляксей Талай і Іван Крупко сустрэліся з выхаванцамі абласнога цэнтра інклюзіўнай культуры

Старшыня аблвыканкама Іван Крупко і заснавальнік фонду, член Нацыянальнай паралімпійскай зборнай па плаванні, прадпрымальнік і матывацыйны спікер Аляксей Талай абмеркавалі развіццё абласнога цэнтра інклюзіўнай культуры і абласнога цэнтра алімпійскага рэзерву па паралімпійскіх і дэфлімпійскіх відах спорту. 

Гасцям расказалі пра творчыя і спартыўныя дасягненні людзей з інваліднасцю, якія жывуць у паўднёва-ўсходнім рэгіёне Беларусі. Акрамя таго, прадэманстравалі шматфункцыянальную інклюзіўную пляцоўку, адрамантаваную дзіцячую чашу басейна, вырабы ручной работы пастаяльцаў з сацыяльных пансіянатаў. 

«Цэнім інтарэсы кожнага» – такі дэвіз у абласнога цэнтра інклюзіўнай культуры. І гэтыя словы тут штодня пацвярджаюць справай. Асаблівую ўвагу надаюць моладзі. Менавіта таму ва ўнутраным дворыку цэнтра ствараюць пляцоўку пад адкрытым небам для правядзення фестываляў і рэалізацыі творчых праектаў маладых інвалідаў. 

Губернатару Івану Крупко і заснавальніку фонду Аляксею Талаю расказалі таксама пра удзел у міжнародных конкурсах, супрацоўніцтва з расійскімі рэгіёнамі, падключэнне да праектаў Саюзнай дзяржавы, планы на будучыню. Творчыя калектывы ўстановы прэзентавалі свае таленты. Мода, вакал і харэаграфія, жэставая песня, цыркавое мастацтва – для выхаванцаў сапраўды няма межаў.

– Як у вас добра, светла і ўтульна! – адзначыў Аляксей Талай. – Хочацца ўсім паведаміць пра гэты ўнікальны цэнтр, у тым ліку сябрам за мяжой. Важна, што вы робіце для саміх дзяцей, іх сем'яў. Вы абуджаеце душу беларусаў, праз ваш цэнтр раскрываецца патэнцыял творцаў. Гэта сінергія магчымасцей і душ, і яна дарагога варта. Доўгі час за вамі назіраю і бачу сур'ёзныя перамены. Ад чыстага сэрца дзякую калектыву гэтага выдатнага месца, з вамі выхаванцы набываюць надзею і магчымасць рэалізаваць сябе. Сюды трэба прывозіць людзей з іншых рэгіёнаў, каб яны ўжывалі падобны вопыт у сябе. 

У сваю чаргу старшыня аблвыканкама Іван Крупко падкрэсліў, што ў цэнтры інклюзіўнай культуры і цэнтры алімпійскага рэзерву па паралімпійскіх і дэфлімпійскіх відах спорту сабралася моцная каманда прафесіяналаў:

– Стараемся ўбачыць патэнцыял у людзей не толькі з Гомеля, але і з раёнаў, даць ім магчымасць расці ў тым кірунку, які яны для сябе выбралі. Тут комплексна развіваецца і спорт, і творчасць.

Іван Крупко ўручыў Падзяку аблвыканкама Аляксею Талаю за падтрымку інклюзіўных праектаў на Гомельшчыне. У адказ спікер падзякаваў Гомельскай вобласці і асабіста губернатару за вернасць традыцыям фонду і любоў да Айчыны.