Старшыня аблвыканкама Іван Крупко сустрэўся з працоўным калектывам і навучэнцамі Буда-Кашалёўскага дзяржаўнага аграрна-тэхнічнага каледжа

Галоўнай тэмай сустрэчы сталі выбары Прэзідэнта Рэспублікі Беларусь. 

Легітымнасць электаральнай кампаніі, удзел у выбарах як права і грамадзянскі абавязак кожнага, фармаванне ў Беларусі высокай палітычнай культуры, эканамічная бяспека краіны – гэтыя і іншыя пытанні абмеркавалі з кіраўніком рэгіёна. 

– Пайсці на выбары і прагаласаваць трэба свядома, з разуменнем таго, якой мы хочам бачыць будучыню сваёй краіны, – падкрэсліў старшыня аблвыканкама. 

Губернатар адказаў і на пытанні з залы. Педагогі і навучэнцы пыталіся аб павелічэнні колькасці мэтавых дагавораў з даплатай, правядзенні ў Гомелі выставы інавацыйных тэхналогій. Цікавіліся таксама, ці магчыма палепшыць якасць мабільнай сувязі і інтэрнэту ў малых населеных пунктах.

– На ўзроўні ўрада летась была сур'ёзная размова на гэтую тэму, рыхтуецца сур'ёзная рэспубліканская праграма. Пытанне прапрацоўваецца, – запэўніў губернатар.

Адзін з навучэнцаў спытаў, якім, на думку кіраўніка рэгіёна, павінен быць малады спецыяліст.

– Важны прафесіяналізм, гэта самае галоўнае. Таму максімальна акунуцца ў вывучэнне сваёй спецыяльнасці. Затым трэба праявіць сябе ў першыя два гады, паказаць свае веды, чалавечыя якасці, зарабіць аўтарытэт. Калі на гэтым этапе вас заўважаць, абавязкова будзе рух наперад, – адказаў Іван Крупко.

У рамках наведвання каледжа старшыня аблвыканкама азнаёміўся з гісторыяй установы адукацыі, яе матэрыяльна-тэхнічнай базай. Для губернатара правялі экскурсію па музейнай экспазіцыі каледжа, а прадстаўнікі мясцовай ячэйкі БРСМ расказалі аб сваёй дзейнасці. 

З навучэнцамі кіраўнік рэгіёна абмеркаваў арганізацыю дасугавай дзейнасці, работу ў летні перыяд, магчымасці студатрадаў. У прыватнасці, прапанаваў маладым людзям падключыцца да будаўніцтва стадыёна ў Буда-Кашалёве.