Старшыня аблвыканкама Іван Крупко правёў прамую тэлефонную лінію і прыём грамадзян

Да губернатара датэлефанаваліся сем жыхароў вобласці, на прыём прыйшлі два заяўніка. Узнімаліся пытанні зямельных адносін, ЖКГ, водазабеспячэння.

Сусед Марыі Цярэнцьеўны з вёскі Пракісель Рэчыцкага раёна адгарадзіў калодзеж, размешчаны паміж участкамі. Доступ да вады ёсць, нядаўна жанчыне выкапалі новую студню. Аднак яна хоча аднавіць мяжу, сцвярджаючы, што сусед яе парушыў. Як запэўніў Іван Крупко, спецыялісты дадаткова вывучаць усе нюансы і вырашаць межавую спрэчку, паставяць у ёй кропку ў адпаведнасці з заканадаўствам.

Бізнес Мікалая Віктаравіча з Мазырскага раёна пад пагрозай – ён вырабляе пасцілу. Пасля праверкі высветлілася, што выдаткі прадпрымальніка перавышаюць даходы. Аднак розніца неістотная. Зрэшты, праверкі працягваюцца. Ініцыіраваны яны, упэўнівае бізнесмен, скаргай суседкі. Губернатар узяў пытанне на асабісты кантроль, справай займуцца спецыялісты.

Наталля з вёскі Хальч Веткаўскага раёна незадаволена якасцю водаправоднай вады. Справа ў састарэлай свідравіне. Як заўважыў Іван Крупко, гэта немаленькі населены пункт, становішча з вадой у ім будзе папраўлена ў сціслы час.

Фермер Дзмітрый з Веткаўшчыны займаецца вырошчваннем дэкаратыўных кустоў, яму патрэбны дадатковыя 15 гектараў. Аднак частка абранай тэрыторыі пад ворнымі землямі. Пытанне разгледзяць, магчыма, пры пацвярджэнні мэтазгоднасці развіцця бізнесу, участак выдзеляць фермеру рашэннем аблвыканкама.

Кацярына з Калінкавічаў паскардзілася на нізкую тэмпературу ў кватэры, асабліва ў адным з пакояў. На сценах, паводле яе слоў, нават з'явілася цвіль. Падобная сітуацыя і ў суседзяў. Губернатар даў даручэнне камунальнай службе выехаць на месца і разабрацца, па магчымасці аператыўна ўстараніць праблему.

Жыхарка Урыцкага Галіна, якая прыйшла да старшыні аблвыканкама, раней узнімала пытанне аб паляпшэнні жыллёвых умоў. На прыёме шматдзетнай сям'і прапанавалі пяць варыянтаў, у тым ліку набыццё новай кватэры па льготным крэдыце, будаўніцтва арэнднага жылля або індывідуальнага дома, зноў жа, на льготных умовах. Усе варыянты дакладна пралічаны, улічаны даходы абодвух бацькоў, наяўнасць мацярынскага капіталу. Сям'і застаецца ўсё ўзважыць і зрабіць выбар.

Прадстаўнікі таварыства ўласнікаў "Паркавы дом" з Гомеля паскардзіліся на будаўнічыя дэфекты, дапушчаныя пры здачы жылога будынка ў 2017 годзе. Высветлілася, што падчас работ будаўнікі адхіліліся ад праекту. Да справы падключыліся гарадскія ўлады, графік устаранення недахопаў складзены і зацверджаны. Губернатар даручыў максімальна паскорыць рамонтныя работы на аб'екце.