Старшыня аблвыканкама Іван Крупко правёў прамую лінію і прыём грамадзян у Гомелі

Жыхары вобласці звярнуліся да кіраўніка рэгіёна з пытаннямі аб правядзенні капітальнага рамонту ў шматкватэрным доме, уступленні ў наследаванне, вырашэнні зямельнай спрэчкі, аднаўленні цяпліцы Мазырскай агародніннай фабрыкі. 

Таццяна Уладзіміраўна са Светлагорска пасля смерці бабулі не можа ўступіць у наследаванне, паколькі па незалежных ад яе прычынах не ўдалося сабраць патрэбныя дакументы ў шасцімесячны тэрмін. Да таго ж не атрымоўваецца даказаць прыналежнасць наследаванага дома бабулі.

Старшыня аблвыканкама запэўніў, што пытанне будзе дэталёва вывучана, у бліжэйшы час з Таццянай Уладзіміраўнай звяжуцца юрысты.

 

Анатолій Віктаравіч з Нароўлі быў на асабістым прыёме ў губернатара ў лютым гэтага года з просьбай аб правядзенні капрамонту ў яго шматкватэрным доме. Тады было прынята рашэнне, што за вясну будзе зроблены праект, а за лета праведзены работы. Аднак на дадзены момант будаўнікі не пачалі рамонт. Іван Крупко растлумачыў, што праект гатовы, сродкі выдзелены. Пытанне будзе вырашана ў бліжэйшы час.

 

Гамяльчанка расказала, што ў яе доме па вуліцы 2-й Калгаснай пасля моцнага дажджу вада сцякае па сценах і пад падмурак. Жыхарка абласнога цэнтра просіць мадэрнізаваць сістэму водаадвядзення. У найбліжэйшыя дні на месца выедзе камісія. 

У новым доме ў Гомелі ўсталявалі недастаткова магутныя насосы каналізацыйнай сістэмы, яны не спраўляюцца з работай, праз што сцёкі трапляюць у падвал. Жыхарам абяцалі ў ліпені замяніць насос на больш магутны, але рамонт не праведзены. Кіраўнік рэгіёна адказаў, што вывучыць сітуацыю, пасля чаго будзе прынята пастанова.