«Роза Люксембург»: на беларуска-ўкраінскай граніцы ў Ельскім раёне адкрыты абноўлены комплекс пагранзаставы

Комплекс будынкаў і збудаванняў паступіў у распараджэнне Мазырскага пагранічнага атрада.

Ва ўрачыстай цырымоніі адкрыцця прынялі ўдзел старшыня аблвыканкама Іван Крупко, першы намеснік старшыні Дзяржаўнага пагранічнага камітэта палкоўнік Андрэй Філатаў.

Падраздзяленне пачало ахову граніцы з Украінай у ліпені 2014 года. На працягу дзесяці гадоў да пачатку рэканструкцыі ў красавіку 2024 года домам для пагранічнікаў служыў пераабсталяваны будынак школы. На час мадэрнізацыі асабісты састаў пераехаў з адміністрацыйнага будынка ў палатачны лагер. У новым комплексе «Роза Люксембург» створаны ўсе неабходныя ўмовы для камфортнага пражывання і эфектыўнага выканання службовых задач. У памяшканнях ўстаноўлена сучасная бытавая тэхніка і мэбля. Па вонкавым перыметры абсталяваны месцы для захоўвання і рамонту тэхнікі, гадавальнік для службовых сабак, а для правядзення заняткаў з вайскоўцамі пабудаваны гарадок памежнай службы і спартыўныя аб'екты.

Застава ахоўвае ўчастак дзяржаўнай граніцы з Украінай працягласцю больш за 25 кіламетраў. На ўзбраенні пагранічнікаў – сродкі радыяцыйнага кантролю, назірання, сігналізацыйныя прыборы, службовы транспарт, у тым ліку матацыклы. Рэгулярна прымяняюцца БЛА. Забяспечана ўстойлівая лічбавая радыёсувязь.

– Вы ахоўваеце няпросты ў палітычным і геаграфічным плане ўчастак граніцы, які характарызуецца мноствам забалочаных месцаў. За 2025 год праведзена вялікая работа на дзяржаўнай граніцы Беларусі з Украінай: гэта чацвёртая застава, адкрытая з пачатку года, у планах – яшчэ дзве адкрыць у снежні. Праектуюцца тры заставы, якія плануюць пабудаваць у наступным годзе. Дадзеная работа будзе працягвацца для забеспячэння нацыянальнай бяспекі, – падкрэсліў губернатар.

Кіраўнік рэгіёна адзначыў, што ахова граніцы сёння – гэта не толькі абарона дзяржаўных граніц:

– Вы забяспечваеце бяспеку прыгранічных тэрыторый, ставіце жорсткі заслон на шляху міжнароднага тэрарызму, нелегальнай міграцыі, актыўна процідзейнічаеце пагрозам эканамічнай бяспекі. Тым самым ахоўваеце спакой і мірны сон беларусаў.

На ўчастку створана добраахвотная дружына і атрад юных сяброў пагранічнікаў. У 2025 годзе падраздзяленнем затрымана дзесяць парушальнікаў дзяржаўнай граніцы.

Андрэй Філатаў павіншаваў асабісты састаў і сем'і пагранічнікаў з наваселлем:

– Няхай на час службы застава стане для калектыва падраздзялення па-сапраўднаму родным домам так, як гэта прынята ў пагранічнікаў.

У сваім звароце намеснік старшыні Дзяржпагранкамітэта падкрэсліў, што Прэзідэнт Аляксандр Лукашэнка асабіста надае асаблівую ўвагу ўладкаванню дзяржаўнай граніцы.