Прамую лінію і прыём грамадзян у Гомелі правёў губернатар Іван Крупко

Праблемы, з якімі звярталіся да старшыні аблвыканкама, тычыліся працаўладкавання, зямельнага заканадаўства, рамонту дарог.

Мікалай Уладзіміравіч з Гомеля просіць прывесці ў парадак участак дарогі, што злучае населеныя пункты Маркавічы, Чарацянка і Новая Гута ў Гомельскім раёне. Яна жвіровая, аднак сельгастэхніка перыядычна сапсуе палатно, пасля чаго легкавушкам цяжка праехаць. Ідэальна, адзначыў гамяльчанін, каб дарога стала асфальтаванай.

– У хуткім часе будзе складзены спіс дарог, якія адрамантуем у бліжэйшую пяцігодку з улікам запатрабаванасці і нагрузкі. На працягу лістапада дадзім вам канкрэтны адказ па гэтым участку, – рэзюмаваў кіраўнік рэгіёна.

Жыхарка вёскі Краснабярэжжа папрасіла павялічыць колькасць дзяржаўных маршрутак з Лельчыц у Гомель, паколькі прыватны транспарт не заўсёды добрасумленна выконвае рэйсы. Губернатар запэўніў, што сітуацыя па забяспечанасці транспартам будзе вывучана: калі сацыяльны стандарт выконваецца, то дадаваць рэйсы немэтазгодна. Расклад з улікам меркавання мясцовых жыхароў можа быць нязначна скарэкціраваны.

Уладзімір Мікалаевіч са Жлобіна патэлефанаваў з просьбай дарабіць дарогу па вуліцы Карыбскага ў новым мікрараёне ад прыпынку «Кальцавая» да водазабору. Пытанне будзе дадаткова вывучана, пасля чаго заяўніку дадуць адказ.