Прадстаўнікі СМІ і камітэта ідэалагічнай працы і па справах моладзі аблвыканкама сустрэліся з будучымі журналістамі

Гасцей слухалі першакурснікі ГДУ імя Ф. Скарыны. Студэнты выбралі для вучобы новую спецыяльнасць "журналістыка", якая з'явілася сёлета на базе філалагічнага факультэта.  

Група складаецца з 16 чалавек, дзевяць з іх атрымалі мэтавае накіраванне ў СМІ вобласці. 

– Нам спатрэбілася больш за два гады, каб гэтая спецыяльнасць зноў з'явілася ва ўніверсітэце. Хочам, каб вы засталіся ў прафесіі і пасля заканчэння вучобы, бо дзяржава зацікаўлена ў якаснай журналістыцы, – перакананы старшыня камітэта ідэалагічнай работы і па справах моладзі аблвыканкама Дзяніс Язерскі. – Спецыялісты вядучых СМІ Гомельшчыны гатовы дзяліцца з вамі ведамі, навыкамі і энергіяй, каб праз некалькі гадоў мы атрымалі сапраўдных прафесіяналаў сваёй справы. Будзьце яркімі і выдатнымі, а мы акажам вам усялякую падтрымку.

Галоўны рэдактар газеты "Гомельская праўда" Сяргей Бяспалы заклікаў студэнтаў ставіцца да абранай прафесіі сур'ёзна і адказна, бо перад усімі работнікамі СМІ стаіць адна задача – інфармацыйная абарона дзяржавы. 

– Некаторыя людзі думаюць, што быць журналістам можа кожны, але гэта не так. Прадстаўнікам нашай прафесіі трэба валодаць ведамі ў абсалютна розных сферах, заўсёды заставацца ўважлівымі і аб'ектыўнымі. Слова павінна быць вывераным і праўдзівым, – падкрэсліў Сяргей Бяспалы. – Спадзяюся, падчас вучобы кожны з вас зразумее, што на самай справе хоча звязаць жыццё з журналістыкай. Без гэтага стаць прафесіяналам не атрымаецца. 

У сустрэчы таксама прыняў удзел дырэктар тэлерадыёкампаніі "Гомель" Аляксандр Дабрыян. Пасля выступленняў былі пытанні ад студэнтаў, іх цікавілі асаблівасці навучальнага працэсу, праходжанне практыкі і размеркаванне на працоўныя месцы пасля заканчэння ўніверсітэта.