Пасля рамонту адчынены будынак АУС Кармянскага райвыканкама

Пабудаваны ў 1985 годзе двухпавярховы будынак поўнасцю мадэрнізаваны.

– Сёння мы адкрываем аптымальна адаптаваны пад патрэбы міліцыі і насельніцтва будынак. Будаўнікі ўсяго за пяць месяцаў змаглі стварыць камфортныя ўмовы для работы праваахоўнікаў, у тым ліку сучасныя сістэмы кандыцыянавання і ахоўнай сігналізацыі. Адрамантаваны гаражы, прыведзена ў парадак прылеглая тэрыторыя. Упэўнены, што такі клопат станоўча адаб'ецца на выніках працы падраздзялення, – не сумняваецца старшыня аблвыканкама Іван Крупко.

У час рэканструкцыі Кармянскага РАУС будаўнікі выканалі аднаўленчы рамонт, замянілі сістэму ацяплення, сеткі электразабеспячэння, водазабеспячэння. Абнавілі і фасад, які зараз будзе дэкаратыўна падсвятляцца.

З'явіўся і ацяпляны гараж з пяццю ўездамі для аўтамабіляў. У гаражных боксах выканана замена інжынерных сетак, устаноўлены аўтаматычныя ралетныя вароты. Адрамантавалі таксама металічныя падстрэшкі на дзевяць машына-месцаў.

– Супрацоўнікі міліцыі нясуць службу ў кругласутачным рэжыме, яны павінны працаваць у камфортных умовах і неадкладна аказваць дапамогу насельніцтву. Мы з вамі той перадавы атрад, які абавязаны зрабіць усё, каб кожны чалавек, дзе б ні знаходзіўся, – у вялікім ці маленькім населеным пункце – аднолькава адчуваў сябе ў бяспецы, – звярнуўся да калег міністр унутраных спраў Іван Кубракоў.

Міністр дадаў: у абноўленым будынку зараз знаходзяцца ўсе падраздзяленні Кармянскага РАУС, у тым ліку ДАІ, аператыўная і міграцыйная службы, што вельмі зручна. Арганізавана безбар'ернае асяроддзе.

Карма сёлета стане сталіцай абласнога фестывалю-кірмашу "Дажынкі-2024". За два гады фактычна адбылася мадэрнізацыя гарпасёлка ва ўсіх сферах, падкрэсліў Іван Крупко падчас размовы з журналістамі:

– Будынак атрымаў новае жыццё. І звонку, і ўнутры ён адпавядае ўсім нормам для работы органаў РАУС і гарантавання бяспекі грамадзян.

Кіраўнік рэгіёна зазначыў, што ў Гомельскай вобласці адкрыццё знакавых, у тым ліку для органаў правапарадку, аб'ектаў стала ўжо традыцыяй. Толькі за апошнія два гады ў рэгіёне адкрылі новы будынак Цэнтральнага АУС у Гомелі, істотна абнавілі будынкі дзяржаўтаінспекцыі ў абласным цэнтры і Жлобіне, адрамантавалі памяшканні Чачэрскага і Светлагорскага раённых аддзелаў унутраных спраў.