Намеснік старшыні аблвыканкама Дзмітрый Алейнікаў правёў прыём грамадзян

З пытаннямі звярнуліся шэсць чалавек.  

Марыя Іванаўна родам з аграгарадка Баршчоўка Добрушскага раёна. Жанчына заклапочаная лёсам Дома культуры на яе малой радзіме: будынак у аварыйным стане, абвалілася частка даху. Памяшканні не выкарыстоўваюцца, а Марыі Іванаўне хочацца, каб блізкае сэрцу месца вольнага часу рэканструявалі. Але спецыялісты інстанцый, у якія звярталася жанчына, запэўнілі, што гэта нерэнтабельна. Намеснік старшыні аблвыканкама даручыў падрабязна разгледзець сітуацыю.  

На прыём грамадзян прыйшлі і жыхары сталіцы. Ірына Вячаславаўна – прадстаўнік адной з кінакампаній Мінска. Яе прадпрыемства плануе зняць фільм, і ў якасці дэкарацый неабходна школа. Кінематаграфістам спадабалася адна з устаноў адукацыі Гомельшчыны. Яны звярнуліся да Дзмітрыя Алейнікава, каб узгадніць магчымасць здымачнага працэсу. Намеснік старшыні зазначыў, што рашэнне павінна вынесці Міністэрства адукацыі. Адказныя асобы аблвыканкама накіруюць неабходныя дакументы і паведамяць Ірыне Вячаславаўне аб выніках разгляду пытання.  

Сярод заяўнікаў і ўдава знакамітага ў абласным цэнтры скульптура, ганаровага грамадзяніна Гомеля Вячаслава Далгова. Вячаслаў Карпавіч – аўтар знаёмых усім гамяльчанам скульптурных кампазіцый "Лодачнік", "Прагулка з хартамі", "Бегучы пасажыр", "Катрыншчык". Ягоная жонка Людміла Мікалаеўна звярнулася з просьбай дапамагчы добраўпарадкаваць месца пахавання мастака. Па словах жанчыны, яна жыве разам з пажылым бацькам, і для яе неабходная сума – непад'ёмная. Дзмітрый Алейнікаў запэўніў заяўніцу, што будзе зроблена ўсё магчымае для таго, каб дастойна ўвекавечыць памяць аб знакамітым творцы.