На нарадзе ў аблвыканкаме абмеркавалі аднаўленне падачы электраэнергіі, расчыстку дарожнай сеткі, забеспячэнне грамадзян будаўнічымі матэрыяламі

Энергетыкі Гомельшчыны сумесна з іншымі службамі працягваюць аднаўляць сістэму электразабеспячэння пасля ўрагану. На раніцу 23 ліпеня засталіся 22 населеныя пункты, дзе даюць электрычнасць дызель-генератары.

Перавесці гэтыя пасёлкі і вёскі на пастаянную схему плануецца да канца тыдня. Як чарговы раз заўважыў губернатар Іван Крупко, планавыя адключэнні на месцах магчымы – гэта часовая мера, каб павывозіць аварыйныя дрэвы.

Абмеркавалі таксама расчыстку дарог, вываз смецця, устаноўку дарожных знакаў. "У гэтых пытаннях не павінна быць хаосу, усё робім акуратна, у абумоўленыя тэрміны і сваімі сіламі", – падкрэсліў губернатар. Адна з прыярытэтных задач пасля ўрагану – убіранне аварыйных дрэў. Прыняць паваленыя, пашкоджаныя ствалы і галінкі неабходна з абочын аўтадарог (сама дарожная сетка ўжо расчышчана). Гэтую ж работу трэба выканаць у населеных пунктах, садоўніцкіх таварыствах, на могілках, прылеглых да аб'ектаў тэрыторыях. "Не проста прыбраць, а аператыўна вывезці і рэалізаваць", – акцэнтаваў старшыня аблвыканкама.

Яшчэ адна задача пастаўлена лясгасам – вызначыць плошчы для пасадкі зялёных насаджэнняў у мэтах аднаўлення пашкоджанага ўраганам ляснога фонду. Пры надыходзе спрыяльных умоў надвор'я пасадкі масава разгарнуцца па ўсёй вобласці. Да акцыі далучацца працоўныя калектывы, грамадскія арганізацыі, моладзь, усе жадаючыя.

Будаўнічых матэрыялаў – шыферу, цэменту, піламатэрыялаў, цвікоў – дастаткова на Гомельшчыне для ліквідацыі наступстваў стыхіі. Аператыўна ажыццяўляецца адрасная дастаўка грамадзянам і арганізацыям.

У цэлым гандлёвая сетка рэгіёна насычана ўсім неабходным для рамонтна-аднаўленчых работ, ажыятажнага попыту няма ні па адной з пазіцый. Да прыкладу, арыенціровачнае запатрабаванне ў шыферы закрыта, але лісты працягваюць паступаць вагонамі. У сельскай мясцовасці пастаўкамі займаюцца арганізацыі спажыўкааперацыі.