На кантролі губернатара. У Плёсах пад Гомелем пачаліся работы па будаўніцтве супрацьпавадкавай дамбы

У цэлым рака Сож раўнінная і спакойная, з ціхім норавам. У той жа час перыядычна здараецца павадак, вада выходзіць на самы верх набярэжнай у цэнтральным парку, сур'ёзна падтапляюцца вялікія тэрыторыі абласнога цэнтра і Гомельскага раёна. Менавіта гэтым і абумоўлена неабходнасць будаўніцтва водаахоўнага збудавання. 

Першы намеснік генеральнага дырэктара Гомельскага абласнога УКБ Мікалай Гаўрылкін адзначыў, што павадак не дазваляе весці на гэтых землях паўнавартасную гаспадарчую дзейнасць:

— Рэалізацыя гэтага праекта дасць магчымасць вывесці з-пад пагрозы падтаплення каля 300 гектараў зямель, а таксама ў адпаведнасці з генеральным планам Гомеля развіваць у Плёсах жыллёвае будаўніцтва, з камфортам размясціць каля 30 тысяч чалавек, пабудаваць сацыяльныя і культурныя аб'екты, гандлёвыя кропкі, транспартную інфраструктуру. 

Сама дамба – гэта земляное збудаванне, на яе спатрэбіцца каля 500 тысяч кубаметраў грунту. Прадугледжаны вадаёмы-назапашвальнікі, якія пасля стануць цэнтрамі рэкрэацыйных зон адпачынку. Будуць таксама ўстаноўлены помпавыя станцыі, вадаскідныя збудаванні, калектары. 

— Праект сур'ёзны, працы ўжо вядуцца: зразанне расліннага грунту, выкарчоўка пнёў, выразка драўняна-хмызняковай расліннасці, мульчавання глебы. Дамба пойдзе па накірунку на паўночны ўсход да чыгуначнага моста праз Сож. Завяршыць праект неабходна ў снежні 2027 года. Для гэтага ў нас ёсць усе неабходныя кампетэнцыі, сілы, сродкі і рэсурсы, — падсуміраваў Мікалай Гаўрылкін.