Моцная і здаровая нацыя – залог развіцця дзяржавы: шэсць раёнаў Гомельскай вобласці ў Дзень народнага адзінства атрымалі перасоўныя фельчарска-акушэрскія пункты

Ключы галоўным урачам цэнтральных раённых бальніц уручыў старшыня аблвыканкама Іван Крупко.

– Гэта не проста транспартныя сродкі, гэта здароўе і ўпэўненасць кожнага жыхара рэгіёна, што медыцынскія паслугі будуць аказаны ў самых аддаленых населеных пунктах. Пытанню здароўя асаблівую ўвагу надае кіраўнік дзяржавы Аляксандр Рыгоравіч Лукашэнка, паколькі наша сіла – у здаровай нацыі, гэта залог развіцця краіны, – адзначыў губернатар.

ФАПы ў падарунак атрымалі Брагінскі, Нараўлянскі, Ельскі, Лельчыцкі, Мазырскі, Гомельскі раёны. Па словах Івана Крупко, сем такіх машын ужо працуюць у вобласці. З пачатку года яны здзейснілі тысячу выездаў, было прынята каля 17 тысяч пацыентаў. Яшчэ сем перасоўных пунктаў закупяць да канца года.

У адказ медыцынскія работнікі падзякавалі кіраўніцтву краіны і вобласці, а таксама падкрэслілі, што ўнікальныя шматфункцыянальныя комплексы дапамогуць аказваць неабходную медыцынскую дапамогу, дабрацца ў самую глыбінку і надаць увагу кожнаму жыхару рэгіёна.