Мітынг на плошчы Працы ў Гомелі працягнуў святкаванне Дня Незалежнасці Рэспублікі Беларусь і 81-й гадавіны вызвалення Беларусі ад нямецка-фашысцкіх захопнікаў

 Дзень Незалежнасці нагадвае нам пра багатае мінулае нашай дзяржавы, самабытную культуру, пра гераізм нашых бацькоў і дзядоў, прадзедаў. Гэта свята аб'ядноўвае ўсіх, хто любіць сваю краіну і адчувае асабістую адказнасць за яе сучаснасць і будучыню, падкрэсліла на мітынгу член Савета Рэспублікі, старшыня абласнога Савета дэпутатаў Кацярына Зянкевіч:

 – Мы трапятліва ставімся да захавання гістарычнай памяці, цэнім мір і незалежнасць, робім усё, каб на мемарыялах заставалася менш надпісаў «Невядомы салдат». Мы ўпэўнены: захаваць памяць і праўду –значыць захаваць будучыню. І менавіта ў гэтым пераемнасць пакаленняў. Сёння мы павінны быць разам, шанаваць мір і згоду, якія з'яўляюцца асновай нашага грамадства. Мы зрабілі свой выбар жыць у незалежнай дзяржаве, і сёння ў нас ёсць усё, каб упэўнена рухацца наперад да росквіту.

 Маладыя людзі Гомельшчыны ў асобе каардынатара клуба ваенна-гістарычнай рэканструкцыі ГДУ імя Ф. Скарыны Станіслава Тыкуна запэўнілі жыхароў рэгіёна, што калі спатрэбіцца, маладое пакаленне абароніць незалежнасць роднай Беларусі:

 – Як чалавек, які вырас на апавяданнях пра вайну, хачу сказаць, што незалежнасць – гэта не падарунак лёсу. Гэта вынік мужнасці простых людзей. Дзень Незалежнасці – гэта не толькі памяць пра мінулае, гэта адказнасць перад будучыняй нашай краіны. Мы, моладзь Гомельшчыны, павінны быць годнымі нашчадкамі пераможцаў.