Ліквідацыя наступстваў урагану на фінішы. У ходзе апаратнай нарады ў аблвыканкаме абмеркавалі тэрміны завяршэння аднаўленчых работ

Старшыня аблвыканкама Іван Крупко таксама акцэнтаваў увагу на аптымізацыі працы са зваротамі грамадзян. 

Патрэбны яшчэ брыгады

Аднаўленне народнай гаспадаркі рэгіёна пасля ліпеньскага ўрагану на стадыі завяршэння. Адрамантаваны практычна ўсе пацярпелыя аб'екты сацсферы, акрамя аднаго будынка. На будынку трэба толькі ўстанавіць адлівы. Крыху больш за дзесятак дамоў з пашкоджаннямі застаюцца ў жылфондзе, усе гэтыя праблемы магчыма вырашыць. Апошнія штрыхі неабходна зрабіць на могілках.

Неадноўленымі застаюцца каля 50 аб'ектаў АПК – у Буда-Кашалёўскім, Добрушскім, Ельскім, Жлобінскім, Калінкавіцкім і іншых раёнах. Неабходна паскорыць тэмпы работ, падкрэсліў губернатар, падцягнуць дадатковыя брыгады і закрыць пытанне. А надалей, прагучала рада для кіраўнікоў раёнаў, больш уважліва ставіцца да ацэнкі шкоды, маштабам работ – не абяцаць, што задачы будуць выкананы, а затым парушаць тэрміны. Адказнасць тут сур'ёзная, пакаранне будзе адпаведным.

Калі нехта думаў, што будзе накрываць пабудовы да халадоў, няхай выкіне гэта з галавы, аднавіць усё ў бліжэйшыя дні, толькі так, сказаў Іван Крупко.

Быў адзначаны важны момант: ва ўсіх гаспадарках працягваюцца асноўныя працы, палявыя і жывёлагадоўчыя, рамонты гэтаму не перашкода. 

Пастаўлена таксама задача актывізаваць уборку паваленых дрэў уздоўж дарог, у першую чаргу тут павінны пастарацца лясгасы. Яшчэ адно даручэнне – абсталяваць раёны неабходнай колькасцю дызель-генератарных установак, там, дзе іх не хапае.

Без вялікіх табліц, даступна

Разгледжана сфера зваротаў грамадзян у органы ўлады. Найбольш папулярныя тэмы з гадамі не мяняюцца: работа камунальнай і дарожнай гаспадаркі, землеўпарадкаванне, пытанні працы і заработнай платы.

Як паказаў аналіз, многія з такіх скаргаў можна было задаволіць на мясцовым узроўні, за адзін-два дні, не даводзячы справу да паўторных зваротаў. У сувязі з гэтым даручана ўзмацніць кантроль рэагавання на сігналы грамадзян, аптымізаваць работу ў сельскіх і райвыканкамах. Асаблівую ўвагу старшыня аблвыканкама запатрабаваў удзяліць інфармаванню насельніцтва аб праектах у будаўніцтве, добраўпарадкаванні. Размова не толькі аб тэрмінах, але і аб змесце работ, у тым ліку пры правядзенні капрамонтаў у жылфондзе, рамонтаў вуліц і дарог. Гэтыя звесткі павінны быць размешчаны на афіцыйных сайтах райвыканкамаў, і не ў выглядзе нечытэльных табліц і пералікаў, яшчэ і схаваных ва ўкладках, а ў больш даступнай форме.

Акрамя таго, на нарадзе зрабілі справаздачу аб рэгістрацыі ў стопрацэнтным аб'ёме пашпартоў гатоўнасці цеплакрыніц і спажыўцоў цеплавой энергіі. За выключэннем дробных нюансаў, якія зараз здымаюцца і не паўплываюць на ўступленне ў ацяпляльны перыяд, Гомельшчына да зімы гатова. 

Да новага навучальнага года таксама ліквідаваны ўсе дэфекты вулічна-дарожнай сеткі побач з установамі адукацыі, рэалізаваны запланаваныя мерапрыемствы па забеспячэнні бяспекі дарожнага руху.