Кіраўніцтва Гомельскай вобласці далучылася да акцыі "Дай лесу новае жыццё!"

Старшыня аблвыканкама Іван Крупко разам са сваімі намеснікамі, памочнікам Прэзідэнта – інспектарам па Гомельскай вобласці Юрыем Горлавым, членам Савета Рэспублікі, старшынёй абласнога Савета дэпутатаў Кацярынай Зянкевіч працавалі на дзялянцы ў Жлобінскім раёне.

Да кіраўніцтва вобласці далучыліся прафсаюзы Беларусі на чале са старшынёй ФПБ Юрыем Сянько, работнікі структурных падраздзяленняў аблвыканкама, дэпутаты.

На пацярпелай ад ліпеньскага ўрагану тэрыторыі плошчай 4,2 гектара Лугавірнянскага лясніцтва высаджвалі хвоі і бярозы ў суадносінах 8 да 2. Пасадачным матэрыялам забяспечыў мясцовы гадавальнік.

– Пароды дрэў выбраны невыпадкова: тут глебы пад гэтыя культуры, у такіх суадносінах будзе лепшая прыжывальнасць, – растлумачыў выбар саджанцаў генеральны дырэктар Гомельскага ДВЛГА Ігар Дзягцярык. – Гарантуем, што тут вырасцім добры лес. Валанцёраў дастаткова, званкі ад іх паступаюць штодня, і мы ўдзячны кожнаму, хто далучыўся да пасадкі лесу.

Ад стыхіі на Гомельшчыне пацярпелі 16,7 тысячы гектараў лесу, дзесяць тысяч з іх падлягаюць аднаўленню. Каля дзвюх тысяч гектараў ужо высаджана дзякуючы добраахвотнікам і валанцёрам акцыі "Дай лесу новае жыццё!". Работы будуць праводзіць у тры этапы: гэтай восенню, вясной і восенню 2025 года. Максімальны аб'ём асвояць менавіта зараз, кампанію лесаводы прадоўжаць, пакуль дазволіць надвор'е, да першых маразоў. Найбольшыя страты ўраган прынёс шасці лясгасам: Мазырскаму, Калінкавіцкаму, Жлобінскаму, Рэчыцкаму, Васілевіцкаму, Буда-Кашалёўскаму.

– Лес у цэлым для краіны – гэта асноўны прыродны рэсурс. Гэта паліва, сыравіна для вытворчасці цэлюлозы, здароўе, наша паветра. Мы павінны беражліва да яго ставіцца, – падзяліўся меркаваннем падчас прэс-падыходу Іван Крупко. – Больш за дзевяць тысяч гектараў буралому пасля летняга ўрагану мы прыбралі на дзелавую драўніну, вытворчасць цэлюлозы і паліва. Цяпер асноўная задача – аднавіць гэтыя тэрыторыі, каб зберагчы нашу прыроду, гэта адзін з этапаў нашага адзінства.

Юрый Горлаў падчас размовы з журналістамі адзначыў, што ўдзел у акцыях па пасадцы лесу стаў традыцыяй для беларускага народа:

– Запаведзь, якая з'яўляецца асновай для нас усіх, – нарадзіць сына, пабудаваць дом і пасадзіць дрэва, сёння трактуецца крыху па-іншаму: нарадзіць не адно дзіця, пасадзіць не адну тысячу дрэў, а той агульны дом, які мы разам будуем, з'яўляецца домам для камфортнага пражывання нашых сем'яў, ён павінен быць цёплым і ўтульным. Тым самым мы паказваем прыклад маладому пакаленню, так павінна быць заўсёды і надалей.