Камфортна і бяспечна для выпускнікоў: у аблвыканкаме прайшло пасяджэнне аргкамітэта па падрыхтоўцы і правядзенні цэнтралізаваных экзаменаў

Зацікаўленыя ведамствы абмеркавалі гатоўнасць пунктаў тэсціравання, тэхнічныя моманты. Галоўная задача – зрабіць так, каб экзамены прайшлі на высокім арганізацыйным узроўні, у бяспечнай і камфортнай абстаноўцы для выпускнікоў. Усе рэсурсы для гэтага ёсць. 

Намеснік старшыні аблвыканкама Дзмітрый Алейнікаў адзначыў, што 26 мая звыш 8200 выпускнікоў нашага рэгіёна будуць здаваць цэнтралізаваны экзамен па выбары. З 13 школьных прадметаў самымі запатрабаванымі сталі матэматыка, біялогія і грамадазнаўства. 29 мая – вучні напішуць ЦЭ па рускай і беларускай мовах: больш за 6700 і больш за 1500 адпаведна. На Гомельшчыне вызначаны 26 пунктаў правядзення цэнтралізаванага тэсціравання, сярод якіх шэсць на базе ВНУ.

Дзеці прайшлі рэпетыцыю і ведаюць, якімі будуць прапускны рэжым, выкананне заданняў і афармленне бланкаў. Механізм правядзення выпрабаванняў застаўся ранейшым, за выключэннем некаторых змен. У гэтым годзе ўведзена забарона на выкарыстанне смартфонаў і сродкаў аўдыё-, відэа-, фотафіксацыі на ўсёй тэрыторыі пункта правядзення ЦЭ, а не толькі ў самой аўдыторыі. Другое новаўвядзенне – на цэнтралізаваным экзамене больш не будуць прысутнічаць настаўнікі-прадметнікі, удакладніла намеснік начальніка галоўнага ўпраўлення адукацыі аблвыканкама Алена Кавалёва.