Іван Крупко правёў прыём грамадзян у Гомелі

Гамяльчанка Таццяна Аляксандраўна прыйшла на прыём па просьбе маці: у доме пенсіянеркі па вуліцы Тэльмана ў Добрушы затапляе прыдамавую тэрыторыю. Жанчына звязвае гэта з тым, што гаспадар суседняй будаўнічай крамы нядобрасумленна зрабіў рамонт і не абсталяваў ліўнеўку. 

З пытаннем грамадзянка звяртаецца не першы раз, за лета гэтага года мясцовыя ўлады адрамантавалі ліўневую каналізацыю, аднак сітуацыя да канца не выпраўлена.

– Вывесці сцёкавыя воды ў гарадскую каналізацыю неабходна і ўладальніку крамы, і гаспадарам ўчастка, – прапануе рашэнне губернатар. – Індывідуальны прадпрымальнік для гэтага можа зрабіць адліўны бардзюр.

Жыхарка абласнога цэнтра Валянціна Рыгораўна просіць аказаць матэрыяльную дапамогу для набыцця пуцёўкі ў санаторый. Інваліду II групы прызначана аздараўленне раз на два гады з падтрымкай дзяржавы, гэтай магчымасцю гамяльчанка ўжо скарысталася. Аднак яна хоча ездзіць у санаторый часцей. 

Ёсць нарматыўныя дакументы, іх неабходна прытрымлівацца. Для таго каб атрымаць яшчэ адну пуцёўку, патрэбная адпаведная даведка і заключэнне спецыяльнай камісіі. Рэабілітацыю таксама можна прайсці па месцы жыхарства, у адной з медустаноў абласнога цэнтра, рэзюмаваў Іван Крупко.