Дзмітрый Алейнікаў наведаў Гомельскае вучылішча алімпійскага рэзерву

Падставай для візіту стаў адзіны дзень інфармавання. На сустрэчы з калектывам і выхаванцамі ўстановы намеснік старшыні аблвыканкама падвёў вынікі пяцігодкі, якая завяршаецца ў Беларусі.

– Можна з упэўненасцю сказаць, што ва ўмовах непрадказальнасці сусветных геапалітычных працэсаў і санкцыйнага ціску наша краіна не проста выстаяла, а і стала мацнейшай, – лічыць Дзмітрый Алейнікаў. – Гэта шмат у чым пацвярджаецца ростам і стабільнасцю беларускай эканомікі, створаны ўсе ўмовы для павышэння дабрабыту грамадзян.

Намеснік старшыні аблвыканкама адзначыў, што ў нашай краіне асаблівая ўвага надаецца забеспячэнню занятасці насельніцтва. Як вынік, узровень рэгіструемага беспрацоўя на Гомельшчыне з пачатку 2021 года знізіўся з 0,2% да 0,05%. У ліку дзяржаўных прыярытэтаў таксама падтрымка сямей з дзецьмі, таму ў рэгіёне за аналагічны перыяд прынята больш за 7800 рашэнняў па прызначэнні сямейнага капіталу. Актыўна развіваецца і сістэма аховы здароўя: у нашай вобласці з моманту старту пяцігодкі выканана больш за 12 700 медыцынскіх і 13 000 складаных аператыўных умяшанняў, пастаянна паляпшаецца матэрыяльна-тэхнічная база паліклінік і бальніц. Таксама агучаны дасягненні ў сферах адукацыі, прамысловасці, культуры. 

Дзмітрый Алейнікаў адказаў на пытанні з залы. Удзельнікі сустрэчы спыталі пра яго захапленні ў вольны ад працы час і любімыя віды спорту.