Дзіцячы сад № 57 на 270 месцаў з'явіўся ў мікрараёне Хутар у Гомелі

Трохпавярховы будынак з мансардамі і вентыляваным фасадам па вуліцы Белага, 58, расчыніў дзверы для маленькіх выхаванцаў. 

Жыхароў Гомеля з паяўленнем важнага сацыяльнага аб'екта павіншаваў старшыня аблвыканкама Іван Крупко. Губернатар уручыў дашкольнай установе адукацыі сертыфікат на 150 тысяч рублёў для развіцця матэрыяльна-тэхнічнай базы.

– Напярэдадні самага важнага дзяржаўнага свята – Дня народнага адзінства – маленькія жыхары маладога мікрараёна атрымалі выдатны падарунак. Па-іншаму і быць не магло, бо ў Навабеліцкім раёне сёння пражывае больш за ўсё маладых сем'яў – 1560, у якіх выхоўваюцца 5000 дзяцей. А непасрэдна ў гэтым мікрараёне з пачатку года колькасць дзяцей павялічылася на 1300, – сказаў кіраўнік рэгіёна.

Іван Крупко адзначыў, што дзіцячы сад поўнасцю забяспечаны кваліфікаванымі кадрамі, многія з іх выпускнікі Гомельскага педагагічнага каледжа імя Л. С. Выгоцкага бягучага года. Заявы на ўсе 270 месцаў ужо пададзены. Адкрываючы такія аб'екты, мадэрнізуючы існуючыя ўстановы адукацыі і арганізуючы бацькоўскія маршруты, дзяржава выконвае важную сацыяльную задачу – забяспечвае камфорт і бяспеку малышоў.

– Любіце сваю цудоўную краіну і малую радзіму, – даў наказ падрастаючаму пакаленню губернатар.

Да віншаванняў далучыліся памочнік Прэзідэнта – інспектар па Гомельскай вобласці Юрый Горлаў, старшыня гарвыканкама Уладзімір Прывалаў.

Басейн, гульнявыя пакоі, унутраны дворык з ценявымі навесамі, выяўленчыя студыі і нават інтэрактыўны скаладром – у дзіцячым садзе ёсць усё для развіцця і адпачынку рабят рознага ўзросту. Будынак абсталяваны ліфтамі, ёсць уласная пральня, прадугледжаны медыцынскі блок і элементы для маламабільных грамадзян.