Член Савета Рэспублікі, намеснік старшыні аблвыканкама Ксенія Панцюхова павіншавала з Днём Перамогі ветэрана Вялікай Айчыннай вайны Пятра Упорава

Гамяльчанін Пётр Якаўлевіч служыў сувязістам, ваяваў на 2-м Беларускім фронце, удзельнічаў у аперацыі «Баграціён». Забяспечваў сувязь падчас Нюрнбергскага працэсу.

Родам ветэран са Свярдлоўскай вобласці. Сяржант-сувязіст быў у ліку тых воінаў, што вызвалялі беларускую зямлю. Ён не раз рызыкаваў жыццём, наладжваючы сувязь пад абстрэламі. Падчас фарсіравання Нёмана яму давялося злучаць разарваны провад, нырнуўшы ў ледзяную ваду. Яскравым фактам у яго ваеннай біяграфіі стала забеспячэнне сувязі падчас знакамітага Нюрнбергскага працэсу.

У абласным цэнтры Пётр Якаўлевіч пражывае з 2009 года. Узнагароджаны ордэнам Айчыннай вайны, медалямі «За баявыя заслугі», «За вызваленне Варшавы», «За перамогу над Германіяй у Вялікай Айчыннай вайне 1941–1945 гг.».

Пётр Якаўлевіч ужо перасягнуў цераз векавую мяжу. Але адчувае сябе бадзёра, у вачах свеціцца энергія сапраўднага байца. Віншуючы франтавіка са знамянальным днём, Ксенія Панцюхова пажадала яму здароўя. Намеснік старшыні аблвыканкама падкрэсліла, наколькі важна цяперашняму пакаленню берагчы і клапаціцца пра ветэранаў, якія ахвяравалі сабой дзеля нашай агульнай будучыні.