Беларускія вучоныя завяршаюць работу над стварэннем буйнамаштабнай карты расліннасці Палесся

Вучоныя Інстытута эксперыментальнай батанікі імя В.Ф.Купрэвіча Нацыянальнай акадэміі навук Беларусі завяршаюць работу над стварэннем буйнамаштабнай карты расліннасці Прыпяцкага Палесся. Аб гэтым у інтэрв'ю карэспандэнту БЕЛТА паведаміў дырэктар навуковай установы Дзмітрый Грумо.

"Палессе - адзін з любімых рэгіёнаў вучоных. Наша каманда толькі вярнулася з экспедыцыі па Нацыянальным парку "Прыпяцкі". У наступным годзе ў лютым у Сусветны дзень водна-балотных угоддзяў плануем прэзентаваць для ўсяго Прыпяцкага Палесся буйнамаштабную карту расліннасці - вынік шматгадовай работы. Гэта самая дэталёвая карта за ўсю гісторыю вывучэння Палесся", - расказаў Дзмітрый Грумо.

Таксама ў наступным годзе супрацоўнікі Інстытута ўдзеляць увагу развіццю сістэмы асабліва ахоўных запаведных тэрыторый у сувязі са змяненнем рэжыму гаспадарання, маніторынгу інвазіўных відаў, гібелі лясоў. На асаблівым кантролі - чарнобыльская зона. "Правядзём наземны і дыстанцыйны маніторынг лакалізацыі экалагічных праблем (усыханне лясоў, пажары, распаўсюджванне інвазіўных відаў), даследуем пытанні дынамікі расліннага покрыва за пасляаварыйны перыяд з распрацоўкай прагнозу дынамікі", - адзначыў Дзмітрый Грумо.

У планах на бліжэйшую пяцігодку - новае раяніраванне расліннага покрыва з улікам яго сучаснай структуры, навуковае суправаджэнне развіцця турызму ў рэгіёне, практыка-арыентаваныя навуковыя даследаванні па аднаўленні шыракалістых лясоў, стварэнні сістэм наземнага і дыстанцыйнага маніторынгу прыродных экасістэм Палесся і інш.

"Палессе - адна з жамчужын нашай краіны - павінна стаць прыкладам рацыянальнага выкарыстання і аховы ўнікальных прыродных комплексаў", - сказаў Дзмітрый Грумо.