Абласны турыстычны злёт працоўнай моладзі «Адзінства-2025» стартаваў у Кармянскім раёне

Яркая трохдзённая сустрэча аб'яднала каля 400 юнакоў і дзяўчат з усяго рэгіёна ў аграгарадку Літвінавічы.

У складзе 25 каманд яны будуць спаборнічаць у гульні ў валейбол, перацягванні каната, тэхніцы веласіпеднага турызму і кіданні аўтамабільных пакрышак. У праграме таксама інтэлектуальныя конкурсы, конкурс турыстычнай песні, эстафета і спаборніцтва на лепшы палатачны лагер.

Пагутарыць з моладдзю ў нефармальнай абстаноўцы прыехаў губернатар Іван Крупко. Ён зазірнуў у розныя лагеры, абсталяваныя ўдзельнікамі турыстычнага злёту. Юныя актывісты Гомельшчыны сустракалі кіраўніка рэгіёна хлебам-соллю, творчымі нумарамі — песнямі і танцамі, загадзя падрыхтаванымі экспазіцыямі. 

У рамках адкрытага дыялогу «Па-гомельскі» ўдзельнікам "Адзінства-2025" прадставілася магчымасць задаць ганароваму госцю пытанні.

— У розных кутках Гомельшчыны жывуць ініцыятыўныя, цікавыя людзі, сапраўдныя патрыёты. Пры гэтым усе раёны ўнікальныя, у кожнага свая гісторыя. Важна, каб яны развіваліся раўнамерна. Таму вялікая ўвага надаецца ўсім сферам: адукацыі, ахове здароўя, культуры, спорту і іншым, — адзначыў губернатар Іван Крупко.

У працяг тэмы спорту старшыня аблвыканкама таксама звярнуў увагу, што пакуль не ва ўсіх раёнах ёсць стадыёны для падрыхтоўкі спартсменаў. Зараз вядзецца сур'ёзная работа ў Лоеве і Буда-Кашалёве: там з'явяцца два сучасныя стадыёны. Далей на чарзе Чачэрскі раён.