Улада
Памочнік Прэзідэнта – інспектар па Гомельскай вобласці Юрый Горлаў з рабочым візітам наведаў Мазыр
05.10.2023
Пытанне, вынесенае на разгляд у ходзе грунтоўнай размовы з кіраўніцтвам райвыканкама, датычылася вывядзення зямель сельскагаспадарчага прызначэння пад індывідуальную жылую забудову.
– У межах горада маюцца свабодныя зямельныя ўчасткі, іх трэба дапрацаваць, а потым прадаставіць у першую чаргу грамадзянам, якія маюць патрэбу ў паляпшэнні жыллёвых умоў. Ёсць і зямельныя ўчасткі, якія адбіраюцца па Указе Прэзідэнта нумар 87, такія патрабуюць ацэнкі і рэалізацыі з аўкцыёну – на Мазыршчыне выяўлена 67. Пасля ўстаранення ўсіх заўваг і выканання рэкамендацый мы зноў вернемся да гэтага пытання, – акцэнтаваў увагу Юрый Горлаў.
Памочнік Прэзідэнта выехаў у мікрараён індывідуальнай забудовы «Паўднёвы». Дарэчы, кожны год у сезон дажджоў праблема адсутнасці цвёрдага дарожнага пакрыцця тут абвастраецца з новай сілай. Аднак за апошнія месяцы сітуацыя змянілася ў лепшы бок: у мікрараёне паклалі новы асфальт, пабудавалі ліўнеўку, якая павінна вырашыць праблему падтапленняў.
Юрый Мікалаевіч назваў кампанію па выдзяленні канкрэтных зямельных участкаў на полі ў непасрэднай блізкасці ад Паўднёвага пакуль дачаснай. Але ў будучыні рашэнне аб перспектыўнай забудове гэтых тэрыторый, вядома, прымуць.
– Мяне зацікавіла і будаўніцтва шматкватэрных жылых дамоў. На Мазыршчыне гэта работа вядзецца на дастаткова высокім узроўні. Паглядзелі і мазырскія таўнхаўсы. Як і ў іншых рэгіёнах, у невялікай колькасці такое будаўніцтва запатрабавана і мае месца быць. У цэлым, у нас вялікія аб'ёмы будаўніцтва жылля – далёка не кожная рэспубліка былога СССР можа прадэманстраваць такія тэмпы, – зрабіў акцэнт памочнік Прэзідэнта.
Ён адзначыў, што раён славіцца прамысловымі і сельскагаспадарчымі прадпрыемствамі, поспех якіх – заслуга добрасумленных працаўнікоў, адданых сваёй справе.
–У такім маляўнічым месцы можна з задавальненнем жыць, працаваць і гадаваць дзяцей, – рэзюмаваў Юрый Горлаў.
У ходзе рабочай паездкі вопытны кіраўнік наведаў таксама Мазырскі скурна-венералагічны дыспансер.