На апаратнай нарадзе ў аблвыканкаме абмеркавалі рэалізацыю чарнобыльскай праграмы і аднаўленне ляснога фонду

Старшыня абласнога выканаўчага камітэта Іван Крупко таксама акцэнтаваў увагу на падрыхтоўцы сельскагаспадарчай тэхнікі да пасяўной кампаніі.

Не прадаецца? Будзем зносіць

Закранулі тэмы аптымізацыі колькасці і фонду аплаты працы ў камунальных арганізацыях Гомельшчыны. У абласным цэнтры і раёнах праведзены маніторынг 435 прадпрыемстваў і арганізацый. Ёсць зрухі ў упарадкаванні хронаметражу рабочага часу, штатнай колькасці ў цэлым, бухгалтарскай справаздачнасці. Аднак работу па ўдасканаленні кадравай палітыкі, падыходаў да аплаты працы, прэміраванні неабходна працягваць і ўзмацняць. Задача скараціць людзей не стаіць, падкрэсліў Іван Крупко, важна навучыць нашы арганізацыі жыць і працаваць па сродках, рацыянальна і эфектыўна. 

Разгледжана пытанне выяўлення ў рэгіёне невыкарыстоўваемай маёмасці. Усяго выяўлена больш за 12,3 тысячы такіх аб'ектаў, уключаючы старыя дамы, прыватныя пабудовы. Больш за 1,7 тысячы знаходзіцца ў дзяржаўнай уласнасці. 

Самы дзейсны спосаб ўключэння ў абарот – продаж на аўкцыёнах. Але многія аб'екты не сыходзяць з малатка гадамі, уключаючы тыя, што прапануюцца за адну базавую велічыню. Іх кансервацыя, як было заўважана, не лепшае выйсце, паколькі такія будынкі банальна ператвараюцца ў крыніцу праблем. Тут і рызыка пажараў, абвальванняў, і эстэтычны фактар. 

Зносу сёлета падлягаюць 559 аб'ектаў. Зносіць іх будуць пад кантролем і з дапамогай службаў МНС. У першую чаргу – самыя небяспечныя.

Адраджаем насуперак "мірнаму атаму" 

Дэталёва разабралі пытанні рэалізацыі праграмы ліквідацыі наступстваў катастрофы на ЧАЭС – накіраванне сродкаў на харчаванне дзяцей ва ўстановах адукацыі, закупку ўгнаенняў і сельгастэхнікі для АПК, электрыфікацыю аграгарадкоў, рэканструкцыю і ўзвядзенне асобных аб'ектаў, іншыя моманты. Губернатар даручыў у тыднёвы тэрмін упарадкаваць фінансавыя патокі, якія накіроўваюцца, асабліва ў частцы паставак угнаенняў гаспадаркам.

Акрамя таго, неабходна паскорыць работу па інвентарызацыі забруджаных радыяцыяй зямельных участкаў, вызначэнню ступені іх небяспекі і магчымасці ўключэння ў севазварот.

Вырошчваць сельгаспрадукцыю на забруджаных радыенуклідамі землях – не проста грубейшае парушэнне. Гэта нонсэнс. Пры выяўленні падобных эксцэсаў, было сказана, да адказных службовых асоб будуць прымяняцца самыя жорсткія меры. 

Але нельга забываць і пра перыяды паўраспаду радыеактыўных элементаў. Часткова тэрыторыі Гомельшчыны вызваляюцца ад "мірнага атама" з цягам часу, што таксама патрабуе ўліку, інвентарызацыі і перагляду статусу такіх зямель. 

Абмеркавалі гатоўнасць сельскагаспадарчай тэхнікі да пасяўной. Яна складае 96%. На палі могуць выйсці 9819 адзінак, 440 застаюцца няспраўнымі. У боксах кіпіць работа, акцэнт рамонтнікі робяць на энерганасычаных трактарах. Сярод іх машыны імпартнай вытворчасці, для якіх чакаюць паставак запасных частак. 

Допуск да ўдзелу ў дарожным руху атрымалі 86% сельгастэхнікі. Сярод спраўных энерганасычаных трактароў – 100%. 

Куды горш справы ідуць з праходжаннем тэхаглядаў грузавым аўта-транспартам у гаспадарках. Гэтую работу трэба тэрмінова паскорыць, бо грузавыя машыны і прычэпы – гэта актыўныя і незаменныя ўдзельнікі вясенняй страды. 

Зараз па максімуму загружаны лясгасы вобласці, якія заняты лесааднаўленнем на ветравальна-бураломных участках. У сувязі з гэтым патрабуецца дзейная дапамога ад прадпрыемстваў і арганізацый, працоўных калектываў у абнаўленні ляснога фонду. У раёнах даведзены канкрэтныя аб'ёмы і задачы. Прыступаць да пасадак дрэў можна ў апошняй дэкадзе сакавіка. 

Старшыням райвыканкамаў, адказным службам патрэбна паскорыць падрыхтоўку мехпарка да веснавых палявых работ, атрыманне допуску самаходнай і прычапной тэхнікі да ўдзелу ў дарожным руху.