На апаратнай нарадзе абмеркавалі пытанні вулічнага асвятлення ў сельскай мясцовасці, працу са зваротамі грамадзян

Разгледзелі таксама тэму энергабяспекі ў сельгасарганізацыях. Старшыня аблвыканкама Іван Крупко даручыў паскорыць устаноўку і падключэнне ў гаспадарках дызель-генератараў.

Каб бездараж не заспела знянацку

Разбіраючы звароты жыхароў рэгіёна ў органы ўлады, закранулі шэраг хвалюючых грамадзян тэм: добраўпарадкаванне вулічна-дарожнай сеткі, у тым ліку ў сельскіх населеных пунктах, аптымізацыю работы грамадскага транспарту. Пастаўлены задачы мінімізаваць рызыку падтапленняў праблемных участкаў дарог і вуліц з улікам набліжэння восеньскай бездаражы, а таксама лепш прапрацаваць аўтобусныя маршруты, якія злучаюць сельскія населеныя пункты з буйнымі гарадамі.

Пытанне энергабяспекі ў гаспадарках АПК у асенне-зімовы перыяд стаіць асабліва востра. На сённяшні момант у вобласці дадаткова закуплена 149 дызель-генератарных установак. 92 ужо зманціраваны і гатовы да работы. Па 57 ідуць праектныя і будаўніча-мантажныя работы. Да 10 кастрычніка ўсё абсталяванне павінна быць устаноўлена і падключана.

Эфектыўна і эканомна

Замена састарэлых свяцілень у сістэме асвятлення сельскіх населеных пунктаў на святлодыёдныя праходзіць на Гомельшчыне згодна з даведзеным графікам. Хаця ў шэрагу раёнаў тэмпы работ неабходна нарошчваць.

Святлодыёды не проста свецяць ярчэй, больш эфектыўна, але і электраэнергіі спажываюць адчувальна менш. 

Гадавы план па замене свяцілень (больш за 9,7 тысячы) за кошт бюджэтных сродкаў выкананы амаль на 60%. Поўны пераход на святлодыёды ў сельскай мясцовасці павінен адбыцца да канца 2025 года.

Разгледзелі пытанні адключэння начнога асвятлення ў райцэнтрах на другарадных вуліцах. Як падкрэсліў губернатар, падыходзіць да гэтага трэба чыста па-гаспадарску: эканомнасць вітаецца, але ў разумных межах, не на шкоду камфорту грамадзян і меркаванням бяспекі.

Памочнік Прэзідэнта – інспектар па Гомельскай вобласці Юрый Горлаў акцэнтаваў увагу на падтрыманні парадку ў падвальных і паддашкавых памяшканнях жылфонду. Важна абмежаваць доступ у гэтыя месцы з надыходам халадоў, ухіліць захламленасць, іншыя негатыўныя моманты. Гэта датычыцца ўсіх раёнаў.

Камунальныя службы зрабілі справаздачу аб тым, што ні адной безгаспадарнай вуліцы ў вобласці не засталося, усе ўзяты на баланс. Дзе-нідзе трэба яшчэ вырашыць пытанні з дакументацыяй, але галоўнае, на такіх вуліцах ужо пачалі ўстараняць заўвагі па змесце, наводзіць парадак.