На апаратнай нарадзе абмеркавалі пытанні добраўпарадкавання і гатоўнасць устаноў адукацыі да навучальнага года

Старшыня аблвыканкама Іван Крупко таксама акцэнтаваў увагу на ўборачнай кампаніі, неабходнасці нарошчваць тэмпы жніва.

Прыцягнуць рэзервы і падцягнуцца

Разгледжаны ход рамонту прыдамавых тэрыторый ва ўсіх раёнах Гомельскай вобласці. Па стане на 28 ліпеня абноўлена 186 двароў – гэта 56% да абласнога плана.

Іван Крупко запатрабаваў паскорыць рамонтныя работы. Адсталым раёнам неабходна прыцягваць рэзервы і падцягвацца. Хутчэй разгортвацца трэба ў Лоеўскім, Акцябрскім, Ельскім, Хойніцкім раёнах.

Асноўныя работы ў дварах, падкрэсліў губернатар, павінны быць завершаны да канца жніўня. Толькі там, дзе стаяць маштабныя задачы, запланавана замена камунікацый, тэрміны выканання могуць перамяшчацца на восень.

Бяспека дзяцей вышэй за ўсё

Падрабязна разабралі тэму падрыхтоўкі да новага навучальнага года. Да верасня сістэма адукацыі Гомельшчыны будзе прадстаўлена 1112 установамі, з іх 494 – агульнай сярэдняй адукацыі.

Рамонтныя работы цяпер у актыўнай фазе, у цэлым узровень гатоўнасці ацэньваецца на 80%. Праведзены дзяржзакупкі, заключаны дагаворы на пастаўку абсталявання. Сумненняў у атрыманні ўсімі аб'ектамі пашпартоў гатоўнасці да патрэбнага тэрміну няма.

Парк школьных аўтобусаў папоўніцца 29 адзінкамі. Закрыты пытанні і па кадравым забеспячэнні: сёлета ў сістэму адукацыі прыйдуць працаваць 780 маладых спецыялістаў. Укамплектаванасць кадрамі складае 99%.

Старшыня аблвыканкама Іван Крупко звярнуў асаблівую ўвагу на забеспячэнне бяспекі – гэта абнаўленне сістэм пажарнай аўтаматыкі, устаноўка электрамагнітных замкаў, відэаназіранне і іншыя меры. Фінансы на гэтыя задачы выдзелены, да верасня ўсе работы павінны быць завершаны.

Яшчэ адно прыярытэтнае заданне для адказных службаў і кіраўнікоў у раёнах – прывядзенне вулічна-дарожнай сеткі, якая прылягае да ўстаноў адукацыі, у поўную адпаведнасць нормам бяспекі.

Вандалаў – да адказу

Абмеркавана таксама пытанне абнаўлення шматфункцыянальных спартыўных пляцовак на Гомельшчыне.

Такіх аб'ектаў у вобласці 18, з іх 5 – у Гомелі. Усе пляцоўкі карыстаюцца павышанай увагай з боку мясцовых жыхароў.

За час эксплуатацыі былі пашкоджаны агароджы, асобныя элементы канструкцый. Усе аб'екты абсталяваны відэакамерамі, з іх дапамогай былі выяўлены факты вандалізму і псавання маёмасці. Вінаватыя асобы прыцягнуты да адказнасці, пашкоджванні маёмасці кампенсуюцца за іх кошт. 

Пастаўлена задача адрамантаваць усе пляцоўкі. Пры гэтым выкарыстоўваць больш трывалыя і даўгавечныя матэрыялы.

Як падкрэсліў губернатар, планы рамонту, разлічаныя да канца бягучага года, не прымаюцца. Тэрмін завяршэння работ – не пазней за 1 лістапада.

Падчас нарады таксама закранулі пытанні ўборачнай кампаніі. Абавязковай умовай для бадзёрага рытму уборкі з'яўляецца арганізацыя аптымальных умоў працы і адпачынку хлебаробаў, годнай аплаты, а таксама падвоз харчавання ў полі. Не бутэрбродаў, як было падкрэслена, а менавіта комплексных гарачых абедаў.