На апаратнай нарадзе абмеркавалі падрыхтоўку сельгастэхнікі да пасяўной кампаніі

Старшыня аблвыканкама Іван КРУПКО запатрабаваў паскорыць рамонтныя работы ў мехпарках АПК

Ва ўтыль па ўсіх правілах

Разабралі пытанні збору другсыравіны прадпрыемствамі, арганізацыямі. Маніторынг гэтай сферы наладжаны, службовыя асобы, якія дапускаюць недапрацоўкі і парушэнні, прыцягваюцца да адказнасці. Горы бітуму, як было заўважана, у межах горада – зусім не норма, а нагода для пошуку канкрэтных вінаватых і прымянення сур'ёзных штрафных санкцый.

Ёсць выразныя інструкцыі па абыходжанні з макулатурай, металаломам, шклом, шы-намі, адпрацаваным маслам, бетоннай крошкай. І ёсць разуменне, колькі такіх адходаў запасіцца ў той ці іншай арганізацыі. Пры выяўленні неадпаведнасці ў справаздачнасці тут жа рушыць услед пакаранне. Ніхто не пазволіць незаконна пахаваць хлам або вывезці другсыравіны ў невядомым напрамку, падкрэсліў губернатар.

Трактары і камбайны рыхтуем загадзя

1 красавіка – дакладны тэрмін, да якога тэхпарк гаспадарак неабходна падрыхтаваць да сяўбы (да 15 сакавіка – не менш як 95 працэнтаў гатоўнасці). Да гэтага дня будзе дадзена і ацэнка кампетэнтнасці кіраўнікоў на месцах, у раёнах і гаспадарках. Пакуль гэты паказчык складае 85 працэнтаў. Адстаюць у рамонце Жлобінскі, Лоеўскі, Кармянскі раёны.

Апроч тэрмінаў работ, дзе-нідзе ўзнікаюць пытанні з якасцю рамонту, на такія факты абласныя службы імкнуцца аператыўна рэагаваць. Да самай жорсткай адказнасці будуць прыцягваць за факты разукамплектавання тэхнікі, халатнага стаўлення да яе захаванасці. У сувязі з гэтым пастаўлена задача аснасціць усе мехдвары гаспадарак сістэмамі відэаназірання.

Абмяркоўваліся таксама пытанні транспартнай сферы, а менавіта – аптымізацыі выкарыстання і захоўвання легкавых аўтамашын у парках дзяржустаноў і «Гомельаблаўтатранса», зніжэння выдаткаў, кантролю перамяшчэння транспартных сродкаў.