На апаратнай нарадзе аблвыканкама абмеркавалі пасяўную кампанію, забеспячэнне кадрамі і тэхнікай

Кіраўнік вобласці Іван Крупко падкрэсліў неабходнасць актывізаваць палявыя работы, асабліва падкормку азімых, падрыхтоўку глебы, сяўбу траў.

Умовы надвор'я спрыяюць аграрыям – на палях рэгіёна паўсюдна выконваюцца ўсе віды работ. Поўным ходам ідзе пасяўная, па стане на раніцу 1 красавіка яравыя каласавыя культуры пасеяны на 32% плошчаў. Глебы пад сяўбу падрыхтаваны на 67% да плана. Паспяшацца з сяўбой і іншымі відамі работ неабходна ў Веткаўскім, Буда-Кашалёўскім, Ельскім, Лоеўскім, Рэчыцкім раёнах.

Калі тэмпы на месцах стрымлівае пераўвільготненасць глебы, трэба больш актыўна выкарыстоўваць машыны на шынах нізкага ціску. Там, дзе іх недастаткова, неабходна арганізаваць двухзменную працу.

Нельга забываць пра травы, нагадаў губернатар. Акцэнт рэкамендаваў рабіць на люцэрне, каштоўнай кармавымі якасцямі травяной культуры. У лідарах па сяўбе траў Брагіншчына.

Трэба паднаціснуць і з падкормкай азімых, ёсць усе рэсурсы, каб завяршыць яе да 4 красавіка. Паскорыцца ў гэтым напрамку абавязаны ў Акцябрскім, Добрушскім, Лоеўскім раёнах.

Па ўсёй вобласці неабходна вырашыць пытанне з забеспячэннем гаспадарак кадрамі. Кампанія не павінна тармазіць з-за недахопу працоўных рук, варта больш актыўна залучаць да работы людзей разам з тэхнікай з іншых арганізацый і галін. Асобнае патрабаванне – паскорыць праходжанне тэхаглядаў.

На нарадзе таксама абмеркаваны пытанні цэнаўтварэння ў сферы гандлю малаком і малочнымі прадуктамі. Пастаўлена задача мінімізаваць аб'ёмы малака першага гатунку на карысць сорта экстра і вышэйшага. У гэтым пытанні важна ўзгадненне заработнай платы даярак, даглядчыкаў жывёлы з якасцю прадукцыі, цеснае ўзаемадзеянне гаспадарак і малочных заводаў і, галоўнае, найстражэйшая працоўная і тэхналагічная дысцыпліна на фермах, адпаведнасць санітарным нормам і правілам. Задача асабліва актуальная ў Год якасці.