Кадравы дзень у аблвыканкаме: у абласной бальніцы і трох лясгасах рэгіёна новыя кіраўнікі

Кандыдатаў на пасады ў розных галінах узгадніў старшыня аблвыканкама Іван Крупко.

Намеснікам старшыні Лельчыцкага райвыканкама па пытаннях эканомікі стане Леанід Боб. Да гэтага доўгі час працаваў у падатковай інспекцыі, цяпер – кіраўнік раённага цэнтра па забеспячэнні дзейнасці бюджэтных арганізацый.

Аляксандр Арчугоў узгоднены на пасаду кіраўніка цэнтра па забеспячэнні дзейнасці бюджэтных арганізацый Акцябрскага раёна. Выпускнік БГЭУ СК працаваў на розных пасадах у падатковай інспекцыі, да прызначэння – у галоўным упраўленні Міністэрства фінансаў Гомельскай вобласці.

Узгоднены новы дырэктар Нараўлянскага спецлясгаса, ім стане Аляксандр Дворак. Чатыры гады працаваў галоўным ляснічым у раёне, бачыць перспектывы развіцця прадпрыемства.

На пасаду дырэктара Чачэрскага спецлясгаса ўзгоднены Дзмітрый Юдзянкоў. Ляснічы Буда-Кашалёўскага лясгаса доўгі час працуе ў галіне, зарэкамендаваў сябе са станоўчага боку.

Юрый Луканенкаў узгоднены на пасаду дырэктара Ельскага лясгаса. З 2001 года ў сістэме Мінлясгаса, працаваў у тым ліку галоўным ляснічым, выконваў абавязкі кіраўніка.

На пасаду выканаўчага дырэктара ААТ «Калінкавічыаграсэрвіс» узгоднены Аляксандр Ярмолін, які працаваў галоўным інжынерам гэтай арганізацыі.

Дырэктарам ААТ «Неначскае» Калінкавіцкага раёна будзе Андрэй Новік. Выпускнік Школы маладога кіраўніка да прызначэння займаў пасаду намесніка начальніка ўпраўлення сельскай гаспадаркі і харчавання райвыканкама.

Васіль Бардашэвіч стане выканаўчым дырэктарам ААТ «Радзіма» Калінкавіцкага раёна. Інжынер-энергетык гэтай гаспадаркі ўдзельнічаў у рэгіянальным праекце «Школа маладога кіраўніка», крыху больш за месяц выконвае абавязкі кіраўніка прадпрыемства.

Галоўным урачом Гомельскай гарадской клінічнай бальніцы хуткай медыцынскай дапамогі будзе Павел Матусаў. З 2022 года з'яўляецца галоўным пазаштатным хірургам галоўнага ўпраўлення па ахове здароўя аблвыканкама. Апошняе месца працы медыка – Гомельская ўніверсітэцкая клініка – абласны шпіталь інвалідаў Вялікай Айчыннай вайны.

На пасаду галоўнага ўрача абласной спецыялізаванай клінічнай бальніцы ўзгоднены Алег Ядранцаў. Да гэтага медык узначальваў Гомельскую цэнтральную гарадскую клінічную паліклініку.

Заключаны новы кантракт з генеральным дырэктарам Мазырскага райжылкамгаса Пятром Хамутоўскім. Падоўжаны кантракт з дырэктарам Веткаўскага спецлясгаса Аляксандрам Католікавым.