Дзмітрый Шынкарэнка прыступае да абавязкаў старшыні Кармянскага райвыканкама

Новага старшыню Кармянскага райвыканкама падчас 57-й сесіі мясцовага Савета дэпутатаў прадставіў губернатар Іван Крупко, ён жа ўручыў службовае пасведчанне. Учора кандыдатуру Дзмітрыя Шынкарэнкі ўзгадніў Прэзідэнт Беларусі Аляксандр Лукашэнка.

– Ад старшыні павінен ісці зарад, а задача кожнага члена выканкама – дапамагчы яму. Паверце ў сябе. Мы дапаможам, але справа за вамі, – дае наказ старшыня аблвыканкама. – Дзмітрый Аляксандравіч вопытны менеджар, які валодае добрым наборам кампетэнцый, здольны надаць новы імпульс эканамічнаму развіццю Кармянскага раёна. Ён гатовы вырашаць шырокае кола кіраўнічых задач.

Раён няпросты, падкрэсліў губернатар. Але пры гэтым прапанаваў зірнуць на сітуацыю па-новаму і зрабіць усё неабходнае для развіцця тэрыторыі: поўнасцю завяршыць мадэрнізацыю льнозавода, прыняць абдуманыя рашэнні па сельгаспрадпрыемствах, удзяліць увагу дарогам і зносу старых будынкаў:

– Землі ў вас адны з самых урадлівых у вобласці. План развіцця рэгіёна ўжо зацверджаны, у наступным годзе тут пройдуць абласныя дажынкі. Дэталёва прайдзіцеся па ўсіх кірунках. Упэўнены, што 2024-ы стане зыходным пунктам для вас, штуршком для развіцця.

За сцвярджэнне кандыдатуры новага кіраўніка Савет дэпутатаў выступіў аднагалосна. Дзмітрый Шынкарэнка падзяліўся планамі:

– Пачынаць работу буду з сельскай гаспадаркі. На гэтым акцэнтаваў увагу і Прэзідэнт. Другая галіна – ЖКГ і падтрыманне горада, добраўпарадкаванне. Тут будзем слухаць насельніцтва, іх меркаванне аб тым, як рэгіён павінен развівацца. Гэтыя дзве сферы аднолькава важныя. Сумеснымі намаганнямі, спадзяюся, даб'ёмся развіцця нашага раёна і рэгіёна ў цэлым. Дзякуй за аказаны давер.

Падзякаваў Іван Крупко за ўклад у развіццё тэрыторыі і папярэдняга старшыню райвыканкама, Яўгена Белаша.

Нагадаем, раней Дзмітрый Шынкарэнка ўзначальваў абласны камітэт па сельскай гаспадарцы і харчаванні.