У Мазырскім райвыканкаме абмеркавалі пытанні выканання праграмы жыллёвага будаўніцтва на Гомельшчыне

Нараду правёў намеснік прэм'ер-міністра Рэспублікі Беларусь Анатоль Сівак.

Асноўныя пытанні, якія разгледзелі з удзелам міністра архітэктуры і будаўніцтва Руслана Пархамовіча, намесніка старшыні Гомельскага аблвыканкама Андрэя Бараноўскага, датычыліся дасягнутых вынікаў і праблем жыллёвага будаўніцтва.

– Ёсць верагоднасць, што заданне ў 550 тысяч квадратных метраў па аб'ёме ўводу жылля ў эксплуатацыю ў Гомельскай вобласці будзе выканана не на 100%. Таму вядзецца напружаная праца для таго, каб дасягнуць пастаўленых мэт. У гэтым годзе некаторыя праблемы ў большай ступені звязаны з недахопам магутнасцей будаўнічых арганізацый, якія былі задзейнічаны на рамонтных праграмах, а таксама на будаўніцтве сельскагаспадарчых аб'ектаў, – адзначыў Анатоль Сівак.  

Таксама ён звярнуў увагу на тое, што на Гомельшчыне, як і па ўсёй рэспубліцы, вядзецца актыўная работа па будаўніцтве прадпрыемствамі арэнднага жылля для сваіх работнікаў. Вельмі важна працягваць ствараць умовы, якія дазволяць арганізацыям будаваць арэнднае жыллё за рахунак уласных і пазыковых сродкаў. Гэта будзе садзейнічаць замацоўванасці кадраў на месцах.

Намесніку прэм'ер-міністра даклалі, што ў Гомельскай вобласці ўвод жылля сёлета складзе 480 тысяч квадратных метраў. Гэта менш за запланаванае, але на 20% больш да ўзроўню мінулага года. Праблем са здачай у эксплуатацыю шматкватэрных жылых дамоў практычна няма. Такія аб'екты ўзводзяць у адпаведнасці з графікам, нязначныя адставанні будаўнікі імкнуцца хутка мінімізаваць. Больш пытанняў са здачай у эксплуатацыю аб'ектаў індывідуальнай жылой забудовы: каля паловы раёнаў вобласці з планам не спраўляюцца. 

– Трэба распрацаваць такі механізм, які даў бы магчымасць раённым выканаўчым камітэтам не толькі кантраляваць будаўніцтва дамоў індывідуальнай жылой забудовы, але і патрабаваць увод канкрэтнага аб'екта ў тэрмін, – акцэнтаваў увагу Андрэй Бараноўскі. 

У рамках працоўнай паездкі Анатоль Сівак таксама праінспектаваў ход будаўніцтва маста праз Прыпяць. 

– Мост складаны, пэўны ўплыў на яго будаўніцтва можа аказаць вясенняя паводка, таму ўжо сёння трэба стварыць пэўны задзел работ, каб вымушанае зніжэнне тэмпу падчас паводкі не паўплывала на выніковую дату здачы аб'екта. На гэты час будаўнікі ўкладваюцца ў намечаныя тэрміны, – падкрэсліў намеснік прэм'ер-міністра.