У Буда-Кашалёўскім раёне адкрылі МТК «Прыбар»

У Буда-Кашалёўскім раёне пабудавалі малочна-таварны комплекс «Прыбар». Новы МТК на тэрыторыі сельгаспрадпрыемства «Нікалаеўка» паблізу вёскі Прыбар разлічаны на 1060 галоў буйной рагатай жывёлы, з іх 864 галавы дойнага статка. 

Прасторныя цёплыя памяшканні – два для дойнага статка і адзін пад сухастой, даільная зала тыпу «Паралель», – комплекс для жывёл будзе максімальна камфортным. Адным словам, тут зроблена ўсё, каб атрымліваць вялікія надоі і малако самай высокай якасці. 

– Сёння мы завяршаем першы этап праграмы па даручэнні Прэзідэнта, якая прадугледжвае будаўніцтва дзесяці сучасных комплексаў. МТК укамплектаваны ўсім – ад матэрыялаў да абсталявання, якія вырабляюцца ў Гомельскай вобласці. Задача комплексу – атрымліваць да сямі тысяч кілаграмаў малака ад каровы ў год, для гэтага створаны ўсе ўмовы, – назваў лічбы старшыня аблвыканкама Іван Крупко падчас урачыстага адкрыцця. 

Прадукцыя жывёлагадоўлі – гэта сур'ёзны ўзровень паступлення валютнай выручкі ў краіне, падкрэсліў губернатар. Таму мадэрнізацыя і будаўніцтва новых комплексаў працягваецца: стартавала новая праграма, вызначаны тэрміны, да канца 2030 года ў вобласці з'явяцца 40 комплексаў. 

Будаўніцтва МТК «Прыбар» пачалося ў сакавіку 2023 года. Сёння ўжо завезены нецелі, ідзе адбор дойнага статка. Па словах дырэктара ААТ «Нікалаеўка» Васілія Панамарова, на сельгаспрадпрыемстве плануецца закрыць чатыры фермы, пабудаваныя ў 70-я гады, адкуль і будуць пераведзены жывёлы:

– У будучым будзем нарошчваць пагалоўе ў гаспадарцы. Укамплектуем комплекс да 1 студзеня. На дадзеным МТК плануем атрымліваць не менш за 20 літраў малака ад каровы ў суткі.