У аблвыканкаме прайшла нарада па пытаннях арганізацыі палявых работ

Губернатар Іван Крупко акцэнтаваў увагу на актывізацыі жніва збожжавых, уборкі рапсу і корманарыхтовак.

Шэрагу раёнаў указана на неабходнасць павышаць нормы выпрацоўкі, закрываць больш гектараў угоддзяў у суткі. Гэта значыць, больш актыўна разгортвацца на палях, перакідваць тэхніку ў гаспадаркі, дзе гэта неабходна, падключаць мехатрады. Усімі сіламі выключаць прастоі камбайнаў.

На жніве трэба падцягвацца аграрыям Акцябрскага, Светлагорскага, Жлобінскага, Гомельскага, Буда-Кашалёўскага, Лельчыцкага, Калінкавіцкага раёнаў. У корманарыхтоўцы, кашэнні траў – у Светлагорскім, Ельскім, Чачэрскім, Хойніцкім.

Губернатар таксама паставіў задачу забяспечыць кругласутачную работу зернесушыльных комплексаў.

– Сушылкі не павінны спыняцца. Толькі так можна задаць аптымальны тэмп уборачнай і пазбегнуць страт збожжа, – падкрэсліў кіраўнік рэгіёна.

Агульны пасыл па жніве – не наракаць на дажджы.

Як адзначыў кіраўнік вобласці, палі хутка праветрываюцца і дасягаюць патрэбнага ўзроўню вільготнасці, тэмпература паветра дазваляе. Аграрыям трэба лавіць пагодлівыя дні і гадзіны, каб падтрымліваць рытм страды, перакідваць тэхніку на гатовыя да ўборкі ўчасткі. Больш за 15 апрацаваных гектараў на камбайн у суткі – гэта павінна стаць нормай. Важна таксама больш актыўна задзейнічаць плюшчылкі для збожжа.

Найважнейшы момант у эфектыўнасці палявых работ – арганізацыя работы  і адпачынку хлебаробаў, падвоз гарачых абедаў. На гэтым акцэнтаваў увагу Іван Крупко. Стварэнне аптымальных умоў для працаўнікоў, якія ўбіраюць ураджай – за гэта адказныя кіраўнікі ў кожным раёне.

Прыярытэтнай задачай таксама застаецца выкананне дзяржзаказу па збожжы і рапсе.

У ходзе нарады абмеркавалі таксама стан АПК асобнага раёна, уключаючы жывёлагадоўчую галіну, – на прыкладзе Акцябршчыны.

На малочных фермах ёсць пытанні да работы даільнага абсталявання. Даручана ліквідаваць усе недахопы ў сціснутыя тэрміны. Губернатар запатрабаваў паскорыць рамонт жывёлагадоўчых памяшканняў, падрыхтоўку аб'ектаў да зімоўкі. Трэба больш актыўна будаваць прафілакторыі для цялят, гэта тычыцца не толькі Акцябрскага раёна.