Трэба не канкурыраваць, а разам адкрываць новыя рынкі: Іван Крупко сустрэўся з акімам Карагандзінскай вобласці Ермаганбетам Булекпаевым

Галоўная частка сённяшняга дня – афіцыйная сустрэча старшыні аблвыканкама Івана Крупко з акімам Карагандзінскай вобласці Ермаганбетам Булекпаевым.

– На тэрыторыі нашага рэгіёна сканцэнтраваны буйныя горназдабыўныя, металургічныя прадпрыемствы, прадпрыемствы лёгкай, харчовай прамысловасці, машынабудавання. Мы экспартуем сваю прадукцыю ў 50 краін свету. Шэраг новых прадпрыемстваў вы ўжо наведалі. Упэўнены, што перспектывы ў нашага партнёрства вялікія, ёсць глеба для міжрэгіянальнага супрацоўніцтва і мы можам працаваць непасрэдна, – падкрэсліў Ермаганбет Булекпаеў.

Акім адзначыў, што рэгіёнам Беларусі і Казахстана трэба не канкурыраваць, а разам выходзіць на новыя рынкі, у тым ліку з дапамогай стварэння сумесных прадпрыемстваў.

Сустрэча пачалася з прэзентацыі эканамічнага і інвестыцыйнага патэнцыялу Гомельскай вобласці. Аб магчымасцях паўднёва-ўсходняга рэгіёна Беларусі расказаў губернатар:

– Казахстан уваходзіць у тройку гандлёвых партнёраў Гомельшчыны. За апошнюю пяцігодку тавараабарот нашай вобласці з вашай рэспублікай вырас у паўтара раза. Аснову экспарту складае мяса-малочная прадукцыя, сельскагаспадарчая тэхніка, прадукцыя метала- і дрэваапрацоўкі. Непасрэдна ў Карагандзінскую вобласць пастаўляецца прадукцыя Рагачоўскага МКК і Тураўскага малочнага камбіната, БМЗ, мясакамбінатаў, фабрык «Рэчыцадрэў», «Прагрэс» і іншых.

У сваю чаргу імпарт з Карагандзінскай вобласці прадстаўлены фасфатамі кальцыя, вырабамі з чорных металаў, ферасплавамі і абсталяваннем. Прадпрыемствы Гомельскай вобласці і Рэспублікі Казахстан знаходзяцца ў пастаянным кантакце, ідзе абмен візітамі, удзел у форумах і выставах, падкрэсліў Іван Крупко.

Наладжванне прамых сувязей паміж рэгіёнамі, у тым ліку на ўзроўні бізнесу, з'яўляецца асновай паспяховага развіцця Беларусі і Казахстана, адзначыў старшыня аблвыканкама:

– Амаль 30 гадоў таму было падпісана пагадненне аб міжрэгіянальным супрацоўніцтве нашых абласцей. Для ўмацавання і пашырэння эканамічных і гуманітарных сувязяў сёння мы яго актуалізуем.

Іван Крупко і Ермаганбет Булекпаеў падпісалі пагадненне паміж Гомельскім абласным выканаўчым камітэтам і акіматам Карагандзінскай вобласці аб супрацоўніцтве ў гандлёва-эканамічнай, навукова-тэхнічнай і культурнай сферах, а таксама план мерапрыемстваў на 2025–2026 гады, які стане дарожнай картай для рэалізацыі гэтага пагаднення.

На сустрэчы абмеркавалі і будучае святкаванне 80-годдзя Вялікай Перамогі. У баях за вызваленне Беларусі ў гады Вялікай Айчыннай вайны загінулі 1125 жыхароў Казахстана, 43 прадстаўнікі Карагандзінскай вобласці – у Гомельскай вобласці. Самыя буйныя бітвы з іх удзелам – Бітва за Днепр і аперацыя "Баграціён", падкрэсліў старшыня аблвыканкама:

– На Гомельшчыне мы шырока адзначаем Дзень Перамогі. Запрашаем вашу дэлегацыю прыняць удзел у памятных мерапрыемствах. 

Акрамя таго, губернатар запрасіў прадстаўнікоў Карагандзінскай вобласці на Гомельскі эканамічны форум восенню 2025 года.