Рагачоўскі раён дзеліцца вопытам па зборы і нарыхтоўцы другасных матэрыяльных рэсурсаў у насельніцтва

Для збору і нарыхтоўкі другасных матэрыяльных рэсурсаў на Рагачоўшчыне арганізавана пятнаццаць стацыянарных і адзін перасоўны нарыхтоўчы пункт.

– На палігоне цвёрдых бытавых адходаў працуе станцыя па сартаванні другасных матэрыяльных рэсурсаў, выманне складае 34,1%. Даведзенае заданне выконваецца, – расказаў журналістам намеснік старшыні райвыканкама Аляксандр Волкаў. – Разам з тым, ёсць над чым працаваць па зборы палімераў, дзе намі прадугледжаны дадатковыя меры.

Каб выканаць заданне па зборы другасных матэрыяльных рэсурсаў, працуе выязны пункт збору ДМР, а таксама праводзяцца сумесныя акцыі з установамі адукацыі.

Машына перасоўнага пункта выязджае ў найбольш буйныя сельскія населеныя пункты раз на тыдзень, стаіць там каля трох гадзін. 

– Загадзя ўзгадняем графікі і паведамляем старшыням сельсаветаў, даем інфармацыю ў мясцовыя чаты, развешваем аб'явы. За раз ахопліваем два населеныя пункты, – апісаў метады работы з насельніцтвам намеснік дырэктара КЖЭУП «Рагачоў» Сяргей Ястрэмскі. – Звычайна збіраем 500–1000 кг макулатуры, 1000–1500 кг шкла, 50–100 кг пластыка. 

З пачатку года ў раёне сабралі 170 тон паперы, 130 тон шкла і 6 тон пластыка.

Жыхаркі вёскі Старое Сяло сёння здалі старую бытавую тэхніку і расказалі, чаму ўвесь час карыстаюцца паслугамі перасоўнага пункта збору ДМР. 

Наталля Макарчыкава:

– Вельмі зручна, што машына прыязджае па нашай просьбе. Сёння здала старыя прасы. Дзякуючы таму, што ў нас забіраюць няспраўную бытавую тэхніку, не захламляецца дом. 

Ала Гарсевіч:

– Даволі часта прыязджае машына, і гэта зручна, бо могуць заехаць прама дадому і забраць тэхніку. Мне не прыйшлося нікога шукаць, а сама б не давезла халадзільнік у горад.