Пераарыентацыю вытворчасці на гомельскім ЗЛіНе вывучыў прэм'ер-міністр Беларусі

Першы пункт у маршруце Рамана Галоўчанкі падчас працоўнай паездкі ў Гомель – завод ліцця і нармаляў.

На прадпрыемстве прэм'ер-міністру расказалі аб мадэрнізацыі аднаго з цэхаў, дзе вырабляюць механічную апрацоўку дэталей.

Холдынг "Гомсельмаш", у склад якога ўваходзіць ЗЛіН, арыентаваны на пастаяннае развіццё:

– Стараемся рабіць вытворчасць сучаснай, каб быць канкурэнтаздольнымі на знешнім і ўнутраным рынках. Актыўна займаемся ўкараненнем імпартазамяшчальных праектаў, – расставіў акцэнты гендырэктар холдынгу Аляксандр Новікаў.

Ёсць падобныя праекты і на заводзе ліцця і нармалей: з наступнага года тут будуць вырабляць і выпускаць касілку КПР-9 з нашым рэжучым дыскам. Раней дэталь закуплялі ў Францыі.

– Заканчваем год з паказчыкамі выканання аб'ёмаў вытворчасці 121,3 працэнта да ўзроўню 2022-га, што дало магчымасць унесці інвестыцыі ў развіццё і мадэрнізаваць асноўны цэх. Дзякуючы гэтаму ў наступным годзе будзем працаваць на інавацыйным абсталяванні і вырабляць больш якасную прадукцыю, – даў справаздачу дырэктар ААТ "Гомельскі завод ліцця і нармалей" Андрэй Кузняцоў. – Акрамя таго, завяршылі асваенне вытворчасці бункера-перагрузчыка аб'ёмам 30 кубаметраў, да гэтага выпускалі толькі на 10 кубаметраў. Палова вырабленых ужо прададзена, у наступным годзе выходзім на поўную серыю да 60 штук.

Азнаёміўся Раман Галоўчанка і з новай тэхнікай "Гомсельмаша", якую запусцяць у вытворчасць у наступным годзе – больш магутнай, складанай і энергаёмістай. Стварыць яе якраз дапаможа мадэрнізаваны цэх ЗЛіНа. Пабываў прэм'ер-міністр і ў ліцейным цэху.

Загружанасць работнікаў на прадпрыемстве 100-працэнтная, на некаторых участках працуюць тры змены. Праблем з кадрамі няма, паколькі холдынг актыўна супрацоўнічае з навучальнымі ўстановамі, за два гады на заводзе знізілі сярэдні ўзрост працаўнікоў з 47 да 41 года.

Партфель заказаў "Гомсельмаша" на 2024 год распісаны поўнасцю.

– Закрываем 2023 з больш чым 3000 адзінкамі самаходнай тэхнікі, у мінулым годзе было 2500. Тэмп росту выручкі – 122% да мінулага года. Добра спрацавалі па інвестыцыях у асноўны капітал, тэмп росту – 168%. Захоўваюцца рынкі, па якіх працавалі, гэта Расія і Казахстан. Плануем адправіць у 2024-м 100 машын у краіны Афрыкі, да 100 адзінак тэхнікі – ва Узбекістан, Туркменістан і Таджыкістан. Закупім больш за 70 адзінак складанага абсталявання, што дазволіць нам канкурыраваць на знешніх рынках. І пастараемся нарошчваць аб'ёмы вытворчасці пад патрабаванні пакупнікоў, – падвёў вынікі Аляксандр Новікаў.