Паўднёвы ўсход Беларусі стаў флагманам: у беларускім пасольстве ў Астане падвялі вынікі паездкі дэлегацыі з Гомельскай вобласці ў Казахстан

Паводле слоў пасла Беларусі ў Казахстане Аляксея Багданава, Гомельшчына стане добрым прыкладам для іншых абласцей, паколькі прадпрыемствы паўднёвага ўсходу Беларусі прадэманстравалі, як трэба рухацца ў плане міжрэгіянальнага супрацоўніцтва.

– Вы ў гэтым напрамку флагман, з вашымі кіраўнікамі ўдалося выразна і хутка дамовіцца, як менавіта мы будзем працаваць з казахскімі партнёрамі. Дасягнутыя дамоўленасці будзем развіваць разам, пасольства трымае іх на асаблівым кантролі. Вы адпрацавалі запланаванае якасна і прадуктыўна, кіраўнікі з'едуць дадому з праграмай дзеяннем на бліжэйшую пяцігодку, – падзякаваў дэлегацыі кіраўнік дыпмісіі.

Пасол выказаў упэўненасць, што патэнцыял працы гамяльчан у Казахстане не вычарпаны, ёсць над чым працаваць:

– Тут вялікая павага да тавараў з Беларусі, гэта брэнд з вялікім імем. Трэба з асаблівай увагай падысці да гэтага рэгіёна, заклікаю стратэгічна правільна выбудоўваць планаванне, тады будзе сістэмнасць у працы.

Старшыня Гомельскага аблвыканкама Іван Крупко падзякаваў дыпламату за дапамогу ў арганізацыі паездкі і работу, якая была праведзена пры падрыхтоўцы да візіту дэлегацыі паўднёва-ўсходняга рэгіёна:

– Вынікам сталі высокія паказчыкі і паспяховыя напрацоўкі, падпісаны шэраг буйных дагавораў. Нам удалося адкрыта пагаварыць з кіраўніцтвам Карагандзінскай вобласці, убачыць патэнцыял іх прадпрыемстваў, агульныя падыходы, прадэманстраваць свае магчымасці. Напрамкаў, па якіх можам працаваць, шмат. Гэта харчовая прадукцыя, дрэваапрацоўка, машынабудаванне і іншыя. Разумеючы патэнцыял нашых прадпрыемстваў, мы бачым вялікія магчымасці па продажы сваёй прадукцыі ў іншых краінах.

На сустрэчы таксама абмеркавалі магчымасць навучання спецыялістаў з Казахстана ў галіне сельскай гаспадаркі на базе беларускіх ВНУ і з практыкай на прадпрыемствах аграпрамысловага комплексу Гомельшчыны.

Пагадненне аб узаемным супрацоўніцтве паміж адміністрацыяй свабоднай эканамічнай зоны «Гомель-Ратон» і гарадскім цэнтрам развіцця інвестыцый Astana Invest падпісана ў беларускім пасольстве.

Акрамя таго, завізаваны дагавор аб намерах па пастаўцы тэхнікі паміж «Гомсельмашам» і «АграмашХолдынгам КZ».

Кіруючая кампанія холдынга «Гомельагракамплект» заключыла мемарандум аб намерах з кампаніяй «Нур Астык Kz», а таксама дагавор афіцыйнага прадстаўніка з прадпрыемствам Interfire.