На нарадзе ў аблвыканкаме абмеркавалі рэалізацыю інвестыцыйных праграм

Бягучыя і капітальныя рамонты, закупка абсталявання для аб'ектаў сацыяльнай сферы, рэалізацыя дзяржаўных і рэгіянальных інвестыцыйных праграм, выкананне дагаворных абавязацельстваў па рэалізацыі будаўнічых праектаў – асноўныя пытанні ранішняй нарады, якую правёў старшыня аблвыканкама Іван Крупко.

У цэлым дадзеныя мерапрыемствы на Гомельшчыне рэалізаваны больш чым на 70 %. Аднак асобныя раёны несвоечасова ажыццяўляюць рамонтныя работы і закупку абсталявання. 

– Да 1 снежня павінны быць праведзены ўсе ключавыя фінансавыя мерапрыемствы, выкананы ўсе ўзятыя абавязацельствы па правядзенні работ і закупцы абсталявання. Дакументацыю для рэалізацыі праектаў у 2026-м неабходна падрыхтаваць да канца гэтага года, – падкрэсліў губернатар.

У цэнтры ўвагі на нарадзе таксама індывідуальнае жыллёвае будаўніцтва, будаўніцтва малочна-таварных комплексаў і рамонт дваровых тэрыторый. 

Прыдамавыя тэрыторыі неабходна пераўтварыць па ўсёй вобласці: асфальтаваная праезная частка, новыя парковачныя месцы, якасны бардзюр, пешаходныя дарожкі. На гэтым зрабіў акцэнт Іван Крупко. Аднак не ўсе раёны адказна падыходзяць да пытання. 

– Дадатковае фінансаванне будзе вылучацца тым раёнам, хто ўмее яго выкарыстоўваць і выконвае тэрміны асваення сродкаў, забяспечвае кантроль якасці работ, – пазначыў кіраўнік рэгіёна. 

Акрамя таго, неабходна паскорыцца з бягучым і капітальным рамонтам жылфонду. 

– Задача старшыняў райвыканкамаў – арганізаваць працу так, каб усе будоўлі гэтага года былі завершаны своечасова, а пераходзячыя на наступны год не адставалі ад тэрмінаў, – падагульніў старшыня аблвыканкама.