На кантролі губернатара: у Нараўлянскім раёне працягваецца будаўніцтва МТК эксбазы «Крынічная»

Будаўніцтва малочна-таварнага комплексу ў населеным пункце Будкі Нараўлянскага раёна ажыццяўляецца за кошт сродкаў Дзяржаўнай праграмы па пераадоленні наступстваў катастрофы на Чарнобыльскай АЭС.

Аб'ект эксперыментальнай базы "Крынічная" падзелены на некалькі пускавых комплексаў. У рамках першай і другой чаргі ўзведзены два кароўнікі, даільна-малочны блок, дапаможныя памяшканні, сем выгульных пляцовак, праведзены неабходныя інжынерныя сеткі, пабудаваны дзве артэзіянскія свідравіны і воданапорная вежа. Гэтая частка комплексу была ўрачыста адкрыта з удзелам губернатара ў верасні мінулага года.

Зараз будаўнікі вядуць работы на трэцім і чацвёртым пускавых комплексах.

– Трэці пускавы комплекс прадугледжвае ўзвядзенне двух цялятнікаў на 380 і 310 галоў, мантаж навеса для цялят, правядзенне сетак электра- і водазабеспячэння, водаадвядзення. Работы на 95% выкананы, чакаем увод праз некалькі месяцаў, – дзеліцца планамі дырэктар УКБ Мазырскага раёна Юрый Татьяненка.

Затым пяройдуць да выканання завяршальнага этапу работ: ўзвядзенню яшчэ двух кароўнікаў, даільна-малочнага блока і дапаможных памяшканняў, ўстаноўцы агароджы, укладцы бетонных праездаў.