На Гомельшчыну з афіцыйным візітам прыбыла дэлегацыя Чэлябінскай вобласці

Дэлегацыю ўзначаліў першы намеснік губернатара Іван Куцаўляк.

З прадстаўнікамі расійскага рэгіёна сустрэўся старшыня аблвыканкама Іван Крупко. Гасцям прэзентавалі патэнцыял Гомельскай вобласці ў прамысловасці, сельскай гаспадарцы, будаўніцтве, турызме, навуцы і іншых сферах.

Аб'ём экспарту ў Расійскую Федэрацыю за апошнія гады значна вырас, сваю прадукцыю ў суседнюю краіну пастаўляюць больш за 600 прадпрыемстваў Гомельшчыны па самых розных напрамках: ад сучаснага даільнага абсталявання да прадуктаў харчавання.

– Тавараабарот паміж нашымі рэгіёнамі ў апошнія гады расце, у тым ліку гэтаму спрыялі санкцыі. Магчымасці абласцей значна большыя, нам ёсць над чым працаваць сумесна. Гатовы знайсці новыя вектары для далейшага развіцця ўзаемаадносін. Галоўнае, каб гэта было выгадна прадпрыемствам і краінам, – запрасіў да паглыблення супрацоўніцтва Іван Крупко.

Кіраўнік рэгіёна абазначыў асноўныя напрамкі для магчымага партнёрства: машынабудаванне, лесаперапрацоўка, аграпрамысловы комплекс.

Іван Куцаўляк у сваю чаргу абазначыў зацікаўленасць у супрацоўніцтве з Беларускім металургічным заводам, прадпрыемствамі харчовай прамысловасці:

– Ёсць мноства сфер, у якіх мы можам быць карысныя адзін аднаму. Многія напрамкі знаходзім зараз, падчас паездкі. Для інтэграцыі нямала інтэнцый, на дадзены момант спрабуем прапрацаваць пытанні лагістыкі і аб'ёмаў паставак. Можам прапанаваць нафтагазавае абсталяванне, прадукцыю лёгкай прамысловасці, у тым ліку спецвопратку, прадукты харчавання.

Першы намеснік губернатара Чэлябінскай вобласці прапанаваў распрацаваць і зацвердзіць дарожную карту далейшага супрацоўніцтва расійскага і беларускага рэгіёнаў. Іван Крупко ідэю падтрымаў.