Кіраўнік спраў Прэзідэнта Юрый Назараў пракаментаваў вынікі селектарнай нарады па ўборачнай кампаніі

Праца на палях кіпіць паўсюдна. Уборка збожжавых пераваліла экватар. 

– Хацелася б, каб ураджайнасць была лепш. Увесну і мінулай восенню зрабілі ўсё, што трэба, але свае карэктывы ўносіць надвор'е, – адзначыў Юрый Назараў.

Найбольшы акцэнт быў зроблены на падрыхтоўцы да азімай сяўбы, у прыватнасці рапсу. Абмяркоўваліся стрымальныя моманты: недзе ўборка саломы, недзе падрыхтоўка глебы. 

Губернатарам Іванам Крупко пастаўлена задача – да 25 жніўня сяўба азімага рапсу павінна быць завершана. Сёлета ўраджайнасць не такая, як хацелася б. Прычына ў капрызнасці культуры: калі не зрабіць тое, што прадугледжана тэхналогіяй, аддачы не будзе. 

Разглядаўся комплекс пытанняў, якія датычацца наяўнасці механізатараў, угнаення, паліва, вызвалення і падрыхтоўкі плошчаў. Адзначалася, што ўсё складаецца ўдалым чынам, зараз галоўнае – кантраляваць працэс.

Кадравае пытанне вырашаецца сумесна з Міністэрствам абароны. Больш за сто чалавек накіравана ў гаспадаркі разам з тэхнікай.

– У вобласці сітуацыя кіруемая. Ёсць агрэхі, але яны заўсёды ёсць. Галоўнае – правільна расставіць арыенціры, – рэзюмаваў кіраўнік спраў Прэзідэнта.

У рамках рабочага візіту на Гомельшчыну Юрый Назараў азнаёміўся з КСУП "Палессе-Аграінвест" Петрыкаўскага раёна.

– Канкрэтна ў гэтай гаспадарцы і ўраджай адносна добры. Усё дзякуючы таму, што праца зладжаная. Гэта вельмі важна, – адзначыў Юрый Назараў.

У планах наступнага года мадэрнізацыя сушыльнай гаспадаркі. Разглядаецца варыянт набыцця зернесушыльнага комплексу вытворчасці «Амкадор». Ён уключае непасрэдна сам комплекс, бункеры для захоўвання збожжа аб'ёмам 18 тысяч тон, лінію ачысткі і падрыхтоўкі насення, лінію пратручвання. Чакаецца, што навінка дасць магчымасць не толькі павялічыць аб'ёмы перапрацоўкі збожжа, але і рабіць гэта хутка і з належнай якасцю.

Удзельнікі нарады наведалі таксама палі гаспадаркі. Прыпяць дзеліць іх на часткі дзвюма паромнымі пераправамі. Як адзначыў дырэктар КСУП "Палессе-Аграінвест" Аляксандр Верамееў, збожжавую групу сеюць на правым беразе, левая адведзена пад кармавую базу. Яна фарміруецца за кошт травы, злакавых, бабовых. Ураджайнасць збожжавых вышэй за ўзровень мінулага года, але з-за поймы і вялікага разліву не ўдаецца дасягнуць жаданага выніку. 

Па тэмпах уборкі гаспадарка падыходзіць да 50%. Разлічваюць на працягу двух тыдняў поўнасцю закрыць пытанне.